Masamu 50 - Amazwi Yakwe Leza 2013

Imipepele yampomvu, iyakucindika Leza ningo

¹ Yawe Leza Wamaka yonsi, awiyo wavwanga, walaizya insi yonsi, ukutandikila sile uku ufumondaka, ukufika nu ku uwondaka.

² Ukufuma uku Zioni, wawala nu usuma umwi uwacipezya mano.

³ Awiyo Leza witu akwiza, asikwiza cimyamya foo. Cimbilimbili ca moto caticimukolelela, alino cipunga ca muza icimulizizya.

⁴ Walaizya amwiyulu na pano nsi uku upinguzi wakwe wati,

⁵ “Kolonganini kunondi, mwe uvi lyane, mwemuno mwapangine nani apa mpolelwa.”

⁶ Amayulu yakalaizya ulungami wakwe Leza pano aliwe kwene, ali kapingula!

⁷ Mwe antu yane uvwini kuno vino nkuvwanga. Izlaeli uvwa namakusinila. Icacumi nene Leza, nupya nene indi Leza winu.

⁸ Insikumusinkola apamulandu ni mpolelwa zinu foo. Nanti asi apamulandu wa mpolelwa zya koca zino mukantula lyonsi.

⁹ Ala nemo nsilonda yacipambasi ya ng'ombe akafuma umu makola inu nanti yasawe akafuma umu maufyo inu foo.

¹⁰ Pano inyama zya mpanga zyonsi, izyane. Iviteekwa vyonsi pyu amazimbi na mazimbi ivyaya umu myamba, navyo kwene vyonsi vyakwane.

¹¹ Ivyunyi vyonsi pano vyapela ivyakwane. Ivyaumi vyonsi kumwi ni vikasela ivya pa musili vyonsi ivyakwane.

¹² Inzala nga yanduma, ntange munene foo, pano insi ni vyaya mwenemo, vyonsi ivyakwane.

¹³ Uzye mukatala mulola kuno nkulya iminyefu yakwe yacipambasi ya ng'ombe, nanti kuno nkumwa uwazi wa mbuzi?

¹⁴ Ukuntaizya ne Leza, lekini akuno kuye impolelwa ya kuntuula, nu kufikilizya ulayo uno mukandaya ne Leza mukulu.

¹⁵ Mwemo mwandaizya sile ndi mwazanzwa na malanda. Nemo namamutasyanga, namwe mumandumbanyanga.

¹⁶ Lelo antu aipe ankota, yene Leza amayanenanga ati, “Icani cino mwemo mungavwangila apa masunde yane. Nanti cino mungavwangila apa upangano wane icani?

¹⁷ Mwemo musilonda ukuti nemo inamukanzula, na amazwi yane, musiyalondela foo.

¹⁸ Mwemo mukati nga mwalola umwivi, ala waya ali cuza winu. Nupya yacizelele ayano mukapita nayo lyonsi.

¹⁹ Ala mwemo utulomo twinu, tukatotola sile iviipe. Nupya musiiuvwa ni nsonyi apa kutumpoka ufi.

²⁰ Mwikalila sile ukusombezya anyonko nu kulondelezya utumilandu utwakuyazewanya.

²¹ Ee, avino mukacita. Uzye mukulonda ukuti nani nsule sile? Uzye mukuti nani naya wakwe mwemwe? Ee, mwalola! Ilelo namunenelapo, namutotwela tonsi pyu.

²² Mwemuno mwansula, ne Leza, cenjelini! Pano limwi mungazana ukuti namusantola ukwaula nu wakuti amutasye.

²³ Wiyo akantula impolelwa ya kuntaizya, aliwe akancindika. Wiyo akanjela, ali wino ne Leza ndatuula!”