Masamu 5 - Amazwi Yakwe Leza 2013

Ipepo lyakulenga ukucingililwa

¹ Sungala ukutike ku mazwi yane, we Yawe, uuvwe vino nkwisya umwenzo.

² Kutika ku kupapata kwane, we Mwene nupya Leza wane. Nkapepa kunuli we Yawe.

³ We Yawe ukauvwa izwi lyane akatondo. Lini ilanzi lyatunka, inkakulenga nga indolela kuti ungasuke.

⁴ Wemo usi Leza wino akazangila mu uyi, awe. Usizumilizya iviipe pa manso yako.

⁵ Avilumba yasiimilila sika apa manso yako. Wapata wiyo wensi akacita iviipe.

⁶ Wemo ukaonona yayo akatumpoka. Yawe wapata inkomi na antu andimi ziili.

⁷ Lelo apamulandu nu kutemwa kwako ukukulu, nemo namaingilanga umu Ng'anda yako ikulu. Namakufukamilanga nu mucinzi, ulunga ni Ng'anda yako iyamuzilo.

⁸ We Yawe, nkweti anisi aingi! Ntungulule umukucita ukulonda kwako, Ungupazye inzila yako pakuti nalondelamo.

⁹ Ivikavwanga anisi yane visi vyakutaila foo. Yene yakalonda sile ukonona ivintu. Imvwango zyao izyakulyongofya, lelo zyazulamo amazwi yausomvi.

¹⁰ Leza we, siyapeele umulandu uyavunuke. Sangala amapange yao yayaletelele uononesi. Uyazinge uku cinso cako, apamulandu wa wingi wa maifyo yao, nga navino yakusangukila.

¹¹ Lelo leka yayo akazina munuli yazange, leka yimbile lyonsi apa kusansamuka. Uwacingilila yayo akutemwa, kuti yayo atemwa izina lyako yazangile munuli.

¹² Umu cumi, we Yawe, ukapolelela yayo akacita ivyaololoke nu kutemwa kwako kukayacingilila wa cisyangu.