Masamu 49 - Amazwi Yakwe Leza 2013

Antu atumpe yakataila mu vyuma

¹ Kutikini kuno mwe antu mwensi! Uvwini mwe ikala nsi konsi,

² acindame, na mwe antu yasilesile, akama na apina kumwi.

³ Vino nkwelenganya kuno, ala ivya kumupanda amano, nkuvwanga amazwi ya mano.

⁴ Nemo nkuma sile umulumbe, nu kuulwila umwi zeze.

⁵ Apa nsita ya uzanzo ntange nuvwe intete, pano umwanisi watanzinguluka.

⁶ Lelo antu yaa, yene yasumvile amano yao ukuvyama, yakuitanka sile apa ukama wao.

⁷ Ala mwine umuntu angaposiwa ukuituula umwenzo wenga. Wene atange alole nanti cimwi icakupeela Leza apakuitulanya.

⁸ Pano umutengo wakulipila apa kuituula, wakulisya ukuluta umu cipimo. Consi cino angezya ukulipila citange cikwane,

⁹ pakumulipilila ukukanaya ukwi lindi, nu kuleka aikalilile pano nsi, umupuma.

¹⁰ Uzye wene asiilolela kuno antu yamano nayo kwene yakufwa, wakwe vino ivipuwa ni viwelewele vikafwa, iyasya ni vyuma vyao kuli yauze?

¹¹ Amalindi yao ala yasyala ali vifulo vyao pe na pe. Ala amuno yasyala yakwikalilila amanda yonsi, nanti angala uku mpiti yaikwatile ivifulo vyao.

¹² Ucindami wa muntu utange umulesye ukufwa foo. Imifwile yao icili conga sile niya nyama.

¹³ Tale kutikini ivikacitikila antu yano yakaitaila aeneco, yao yano imyenzo yao yataila sile umu vyuma vyao.

¹⁴ Ala yene intipu zyao, izya kufwa wa mfwele umu citata. Nupya imfwa kwene, ali mucemi wao, na antu alungame ali yano yakayateeka. Lino ulaca ucindami wao ulongoloka, ni cifulo cao, umwi lindi.

¹⁵ Lelo nemo, Leza alapususya umwenzo wane, alansompola kuti ntaponela umwi lindi, nu kumpokelela.

¹⁶ Utasakamala umuntu umwi nga walonka ivyuma, nu ucindami wa ng'anda yakwe ndi wakulila kweneko.

¹⁷ Pano apa kufwa kwakwe, atalasenda penepo nanti conga, nu ucindami wakwe, utalamulondela foo.

¹⁸ Nanti sile lino wali pano nsi nu kuilola wa mupolelelwe, na antu ala yakumulumbanya apa ucindami wakwe,

¹⁹ nalyo kwene alafwa sile wakwe vino ivikolwe vyakwe vyafwile, nu kuya ikala navyo pee, kuku kwene ukwaya akanda akamuyayaya.

²⁰ Ala ucindami wa muntu utange umulesye ukufwa foo. Imifwile yakwe, icili conga sile ni ya nyama.