Masamu 48 - Amazwi Yakwe Leza 2013

Ulwimbo lwakuwanzya Zioni umusumba wakwe Leza

¹ Yawe ali mukulu nupya afwile ukucindikwa wakwe cimwi umu musumba wakwe, uwaya apapela ya mwamba wamuzilo.

² Umwamba wakwe Leza uwa Zioni, waya utumpuke nupya uusuma. Ee, icacumi umwamba wa mwene Mucindami ukasansamusya antu yonsi aya pano nsi!

³ Leza watailanga ukuti aliwe amuno antu yakwe yakazina, umukasi ki linga lya musumba wakwe.

⁴ Limwi yamwene yatazile iyakongana pamwi nu kwiza zanza umwamba Zioni.

⁵ Walanga yaulola, cayapezizye amano, iyuvwa intete iyapuka nu lwilo.

⁶ Fwandi ali vino intete zyayalemile iyaasela sile wa mwanaci ali mupipi nu kwelepa umwana,

⁷ ungati avino umuza ukafuma uku ufumondaka, ukaonona ivyombo vyaku Tasyisyi.

⁸ Ivintu vii vino tuuvwile, lyene twasuka twailolela umu musumba wakwe Yawe Wamaka yonsi, mu musumba wakwe Leza witu. Ee, ica cumi akauwaka lyonsi!

⁹ Umu ng'anda yako we Leza, ali muno tukakutumalilapo apa luse lwako ulwa muntaputuka.

¹⁰ Antu yakakulumbanya mpanga yonsi, nu lulumbi lwako lwalimba insi yonsi. Ee, icacumi, kwene ukateeka umu kulungika.

¹¹ Leka fwandi antu yamu Zioni yazanga! Imipingwile yako, yaya ilungamane, leka fwandi imisumba yonsi yamu Yuda yazanga.

¹² Tantamini imilongo, muzinguluke umusumba wa Zioni mufume mukupenda amalinga yakweo.

¹³ Mwalolekesya sana iviumba nu kuceceta ivimpinda apakuti muce mwalondolwela inkulo iziliza uku cisila, ala mukuti

¹⁴ “Muu, umwaya Leza witu uwa pee na pee, ali katungulula witu uwa manda na manda, umuyayaya.”