Masamu 45 - Amazwi Yakwe Leza 2013

Ulwimbo lwakulumbanya uwinga wakwe kateeka

¹ Nemo ninkwata amazwi yamwi asuma, a lwimbo luno natinsika ulwa kulumbanya kateeka. Izwi lyane limatololokanga kwati akalembelo kakwe kalemba uwi lembo ilisuma.

² Wemo wewe monsi umwi umusuma ukuluta yonsi nupya wewe kavwanga umwi akavwanga usaka sana. Umu cumi, Leza wakupolelela insita zyonsi.

³ Kwapila ulupanga lwako, we lumba lya maka. Wemo wakwatisya amaka, nupya wacindamisya!

⁴ We mucindami, kalauka kacimvye, pano swemo tukulonda sile ulongo nu kulungika! Amaka yako yamaleka kuti ukacimvye!

⁵ Inceto zyako pasi pakukalipa, zikatota izitulinkanya mu myenzo ya anisi yako, yakaiza yaponela pano wimilile.

⁶ Icilimba ca wene cino Leza wakupela, icakuyelelela amanda yonsi! Uwene wako, wene ukauteeka umu kulungika.

⁷ Wemo watemwa ivintu ivilungame, wapata ivintu iviipe. Ali mulandu kwene uno Leza, uwaya Leza wako wakusolwile nu kukupelesya insansa izivule ukuluta apa yauzo.

⁸ Insalu zyako zikanunkila usaka, ku cinunu cisuma cakwe mule, aloe ni misisi na mafwa yauze acinunu cisuma. Yakalizya ya ngoma na yakimbila ya nyimbo, yakaiza kunuli uku kwimbila ukwi sano kuno ya kukuulila na mino ya nzovu.

⁹ Pali ya mama amwi sano lyako paya penepo na ana ya mwene. Alino nupya lwa kwikasa lilunji ku cilimba cako ca wene uku kaimilila namwene, ala azwite insalu izya usaka, iziyembe zyakwe zaabu waku Ofili.

¹⁰ Siuvwa kuno, we mwana mukazyana, funtusya amano yako uku antu yako nu ku luko lwako.

¹¹ Ukuyemba kwako uku malekanga ukuti umwene akulonda. Ali cino wemo fwandi, ulinzile uku muyela pano wene ali musambazi wako.

¹² Antu yaku Tuli yamakutulanga ivintu, na akama nayo yamakusansamusyanga apakuti nawe uwa yavwangilako.

¹³ Umwi sano kwene, ali muno mwaya umwana wa mwene umwanaci, nawe pasi pakuzipa! Ilaya lyakwe lyasumwa nu usavu wakwe zaabu.

¹⁴ Ali wino yatwalanga uku mwene, ali wiyo wino azwite ilaya lya maala apusane pusane, ni nsindisi zyakwe, nazyo zikumusukilila.

¹⁵ Ayayo yapita, yakucina nu luzango lukalamba yaya yingila nu mwisano lya mwene.

¹⁶ We mwene, ala ulaya na ana nyanya aonsi yano yaliza yapyanikizye apa vikolwe vyako. Nupya ulayalasika na pa vilimba vya wene, ivyakuteeka impanga zyonsi.

¹⁷ Ica cumi, ulwimbo lwane lulaleka ukuti uce ulumbuke amanda pe, nu kulenga ukuti antu yonsi yace yakulumbanya amanda pe.