Masamu 42 - Amazwi Yakwe Leza 2013

LUPAPULO LWAKWE CIILI (Masamu 42-72) Ipepo lya muntu imbutusi

¹ Ndi vino inswela ikayaseela apa kulonda ukuli amanzi azuke, avino nani kwene nkukulukisya cuze we Leza.

² Umwenzo wane ukulukisya we Leza, Leza wane uwa uumi. Uzye alilaci fwandi lino ndiza mpepele apa manso yako?

³ Umusanya nu usiku nkalaizya na minsozi yane yasuka yasanguka icilyo cane. Lyonsi anisi yane yakanguzya yati, “Uzye Leza wako ali kwi?”

⁴ Umwenzo wane ukakulukunta ndi niusya ivyampiti, lino nayanga na maumba umu ng'anda yakwe Leza. Anene kwene natungululanga mulongo wa antu ni nsansa, lilyo ala tukwimbila Leza nyimbo zyakumulumbanya.

⁵ Icani fwandi cino nati nkungumalila? Icani cino nemo nati nsakamalila vii? Awe cumi, nemo nkanataila sile Leza, pano nemo awino namalumbanyanga ndi vino nacitanga mpiti, pano ali katula wane na Leza wane.

⁶ Umwenzo wane nemo ukukulukunta wakwe cimwi, ali cino fwandi, nkanalukukwiusya we Leza wane, muno mpanga muno naya iya Yodani, umupipi nu mwamba wa Helimoni nu wa Mizali.

⁷ Amaziya yakwe yayemba yakulaizyanga, ni vipoma vya manzi vyakwe Leza vikupooma! Vili wa mayimbi ya malanda ati yasambezya umwenzo wane.

⁸ Su mwene alukulanga ukutemwa kwakwe ukwa pe akasanya, apakuti nalukumwimbila usiku, nu kupepa kuli Leza wiyo akampeela uumi.

⁹ Nkunena we Leza, we ciliwe cane, awewe nkunena nati, “Uzye pacani cino wantazyelela? Uzye pacani cino ningatwalilila ukupita umukutumale pamulandu sile ni zunya lya anisi yane?”

¹⁰ Vimatusi vya anisi yane vyati vimpezya amano. Yene yikalile sile ukunguzya pe pe pe iyati, “Nga Leza wako alikwi?”

¹¹ Uzye pacani fwandi cino nikalile ulanda ulanda vii? Icati cinsakamalika vii icani? Awe nemo nkanataila sile muli Leza, nupya kwene ali wino nemo namawanzyanga, katula wane na Leza wane.