Masamu 41 - Amazwi Yakwe Leza 2013

Ipepo lya muntu mulwale

¹ Walongo umuntu wiyo akasakamala mupina nu mulanda, Yawe nawe alamukulula uwanda wa ntazi.

² Yawe akamucingilila nu kumusunga, akamulenga aye nu luzango muno nsi, asimusunkilizya nu mu minwe ya anisi yakwe foo.

³ Umu kulwala Yawe akamwazwa, nu kumuletela umutende wa mpomvu.

⁴ Nemo nkuti, “We Yawe, unganguvwila uluse, umpozye pano naifya kunuli!”

⁵ Anisi yane yakuvwanga itolo kunondi, “Uzye alafwa lilaci pakuti akililike?”

⁶ Yayo akwiza umukumfwilizya yakwizila viili, yakwizila umukulondelezya ivyakuntumpwila, nu kufuma yakwalazya mpanga yonsi.

⁷ Yonsi yano yampata, yikalila sile ukutotozana, nu kuntunganya muli vyuze vyuze.

⁸ Yakuvwanga iyati, “Walwala yakufwa, atalatala akatuke nupya apa citala.”

⁹ Na yacuza yane kwene, apa mwenzo yano nataila kwene yano twalyanga nayo nu kumwa nayo, yati yansangukila.

¹⁰ Lelo wemo we Yawe, uye na mizu kunondi! Nkatusye uleke ince nkalandule ku anisi yane!

¹¹ Ali muno ndamanyila ndi vino wantemwa umu cumi, umwanisi wane atakatale akayuvwe pali nene.

¹² Lelo wemo, ukantungilila nu kumpisya ulumi, ukansungilila pe na pee, apa cinso cako.

¹³ Lumbanyini Yawe, Leza wakwe Izlaeli. Kalumbwe ilelo pe na pee! Ciye vivyo kwene! Ciye vivyo kwene!