Masamu 40 - Amazwi Yakwe Leza 2013

Ulwimbo lwa kulumbanya nu kulenga

¹ Nemo nalolela Yawe nu mwenzo wane onsi, kuti angazwilizye. Lyene wasuka uvwa ukupapata kwane.

² Wamfumya mu ciwina icitaiipila, umu matipa umu lutikiti! Anteeka apa ciliwe apapela, pano nasonkomala.

³ Ali pakunsambilizya ulwimbo lupya, ulwakulumbanya Leza witu. Antu avule apakulola cico, yalaya ni coopo, nga yataile muli Yawe.

⁴ Walongo umuntu wino wataila muli Yawe, wiyo asitwala amano uku tuluwi nanti asilondelela yakapepa yakwe tuleza twaufi.

⁵ We Yawe, Leza wane, ala vino watucitila ivyakuzunguka ivivule, Vino wemo watuteyanyizizya pasi pa wingi. Icacumi pasi nanta wenga uwaya wakwe wewe! Nga cakuti nati nkandande vyonsi pano vyapela, awe cumi ntange nkume mwenemo, pano vyavula wakwe cimwi.

⁶ Impolelwa na mawila wemo usivilonda, awe. Lelo wemo wampeela amatwi akuvwilako. Usilonda amawila yakoca na mawila yakwelela amaifyo.

⁷ Nani ali pakwasuka inti, “Endi apano ndi, niza, ndi vino calembwa pali nene umu lupapulo lwa masunde.

⁸ Ala nemo pasi pakutemwa ukucita vino wemo ukalonda, we Leza wane! Endi amasunde yako, nemo nkayawaka umu mwenzo wane.”

⁹ Umu ukongano ukulu wa antu yako, amuno nemo numa imbila yi landwe lisuma ilya ufyusi wako. Ala we Yawe wamanya mpiti ukuti nemo ntalatala inte ukwalazya ilandwe lii.

¹⁰ Insyakutala mfise amazwi akuti wemo ukapususya. Lyonsi sile nkavwanga apamulandu na ucumi wako nu wazwilizyo wako. Umwi uvi lyako, nsiikala cele, apamulandu nu kutemwa kwako ukwa muntaputuka. Na pali ucumi wako, nkavilanda penepo umwi uvi lya antu yako ilikalamba.

¹¹ We Yawe nemo namanya ukuti wemo utalatala ute ukundanga amizu! Ukutemwa kwako ukwa muntaputuka na ucumi wako ali vino vimansungililanga pee.

Ipepo lyakulenga uwazwilizyo

¹² Amalanda avule wakwe cimwi yatiyamvulila, Uyi wane uwati ulenga vyonsi vii. Lyene natinsuka intela mwenemo nu kulolekesya. Uyi wane watiuvula ukuluta ni nyele zyaku mutwe wane, cati cimputula nu musana.

¹³ We Yawe, napapata untuule kweneko! We Yawe, napapata kalauka ngazwe!

¹⁴ Leka yao akulonda uku nkoma yazewane, ni nsonyi ziyaleme! Leka yao akuzanga apamulandu wa macuzi yane, yaswilile mwenemo ale yati yaponya ni nsuka.

¹⁵ Uleke yao akumpundilila yati, “Owe! Owe,” amano yao yayapele apakulola ukuti yacimviwa.

¹⁶ Leka yao akaiza kunuli yasansamuka nu kuzanga! Leka yao atemwa ufyusi wako, lyonsi yati, “Yawe umukulu.”

¹⁷ We Yawe, nemo nene mupina nu mulanda, lelo uwalukunjiiusya. Wewe kazwa wane na katuula wane. Sungala ucincile ukwiza ntuula.