Masamu 38 - Amazwi Yakwe Leza 2013

Ipepo lya mulwale akacula

¹ We Yawe, ala utampingwila ukali ukali, utankalipila lino ucili ni cipyu!

² Pano inceto zyako zyati zindasola. Watumfwanta na pansi.

³ Pamulandu sile wa cipyu cako, nati nsuka ndwalisya umwili wane onsi pyu, pasi pakulwala pamulandu wa kwifya kwane.

⁴ Uyi wane wati unduta, wati untuwizya mwi ziya lya maifyo yane. Vyati vintotomezya pansi pamulandu wakunyoma kwaviko.

⁵ Pamulandu nu uwelewele wane, ivilonda vyane vyativiola vikununka.

⁶ Natinkontama nkukongoza sile, nkulosya sile umusanya onsi.

⁷ Nati nkaya na see, pamulandu wa kulwala impepo, ni ndwala wakwe cimwi.

⁸ Umwili wane pasi pakuvungoka, ni vyakucita vyati vimbula. Umwenzo wane wati usama apapela, nkufuteeka sile.

⁹ We Yawe, vino nkulonda watuvimanya mpiti, vino ukuvwa nakuno nkuteta.

¹⁰ Umwenzo wane uku kulukunta, na maka yatiyasila, na kanda katikaya pa manso.

¹¹ Ivyuza vyane, na inipamba lyane, yati yantaluka apamulandu wa vilonda vyane.

¹² Yao akalonda uku nkoma nayo yati yanteya inkose, na yao akalonda uku ncisa, yakungofya. Anene sile yikalile umusanya onsi ala yakumpangila.

¹³ Indi sile wakwe cipuli akuposiwa ukuvwa, wakwe ciulu akuposiwa ukuvwanga.

¹⁴ Indi sile wa muntu asiasuka, pamulandu wakuti atange auvwe.

¹⁵ Nataila munuli we Yawe, acino nawe Mwene Leza wane umanjasuka!

¹⁶ Utaleka anisi yane yayuvwe panondi, utaleka yuvwe icilumba kunondi, ndi cakuti ulwazo lwane lwasyelemuka napona!

¹⁷ Vikwene, ala indi umupipi nu kusyetuka impone, ukuwaikwa kwane kusitala kuleka imfute ningo.

¹⁸ Kwene nkuilongwela ukwifya kwane, nu kusakamala nene musakamale apa kwifya kwane.

¹⁹ Antu akamfyenga ukwaula umulandu yakulu kuvulila kweneko. Yao ampata sile uku mufulo, yene yasi yakupenda.

²⁰ Pa visuma vyane yene yakancitilapo ui. Yakundwisya nemuno nezyanga ukucita ivisuma.

²¹ Utantazyela, we Yawe, we Leza wane utansya nenga.

²² Iza zuwa ndungazwe, we Mwene nupya Katula wane.