Masamu 37 - Amazwi Yakwe Leza 2013

Impelelekezyo ya muntu mwipe ni ya muntu musuma

¹ Citakusakamika apa uyi wa antu aipe, utauvwa uzuwa kuli yakaluvyanya.

² Yalafoota zuwazuwa wi sote lyume, nu kuuma wa mulemvwe.

³ Tailanga muli Yawe nu kucita ivisuma, ikalanga nu longo mu mpanga.

⁴ Walonda ukuzangila muli Yawe, nga nawe alakupeela ivikalonda umwenzo wako.

⁵ Sekezya amikalo yako kuli Yawe, umutaile nawe alakwazwa.

⁶ Alalenga nu kuti usuma wako wayengesa wa luswepo, nu ulungami wako ulawala wakasanya apakasi kamutwe.

⁷ Utekele sana nu kutaila muli Yawe, utasokela wiyo uwaya nu longo, nanti wiyo akacita ivya ucenjezi.

⁸ Utacita cipyu utaleka cikupenye! Utasakamikwa! Ala citange cikwavwe nanti cimwi.

⁹ Pano yayo acita cipyu yalayazinga, na yayo alataila Yawe, yalikala umutende umu mpanga.

¹⁰ Kwasyala sile akasita kanono, umwipe atalaya penepo. Nga wacelecensya apa ncende yakwe, utalamuzana foo.

¹¹ Lelo yao aicefya yalapyana impanga nu kusyukila ulongo ulumalilike.

¹² Umuntu mwipe wene akapangila umusuma, nu kumulumila incecete.

¹³ Lelo Umwene wene akamuseka pamulandu wakuti akamanya ukuti wasya ace aononeke.

¹⁴ Antu aipe yakasomola masumo yao, nu kukana malapwa yao kuti yakome alanda na apina, yayo akapita mu miyele isuma.

¹⁵ Lelo amalupanga yao yalasenuka yayakome aisikulu kwene, na malapwa yao yawele yavuneke.

¹⁶ Utunono tuno umuntu mololoke wakwata, twaluta apavyuma ivingi ivya mwipe.

¹⁷ Pano amaka ya muntu mwipe yalononeka, umusuma wene Yawe akamukomelezya.

¹⁸ Yawe akawaka amanda ya muntu musuma, ni vyuma vino wapyana vilayelelela.

¹⁹ Umu nsita ya ntazi yataluvwa insonyi nu mu nsita ya cipowe namo yalaikuta.

²⁰ Aipe yalalowelela. Anisi ya Mwene yalononeka kwati amaluwa yamu nyika. Nu kusendwa yalasendwa wa cunsi.

²¹ Umuntu mwipe akakongola ukwaula nu kulipa. Lelo umusuma wene waya nu wila nu kupeela akapeela.

²² Yano Yawe akapolelela yalikala ningo umu nsi, lelo yao yano akatipwila yalasukulwa.

²³ Yawe aliwe akatungulula intampulo muno umuntu angapita ningo, nu kumuzanzya cikamuzanzya ndi walola vino akutampula ningo.

²⁴ Ndi wapona asisyala alambalile, pano Yawe aliwe akamulemelela, akatuka.

²⁵ Nali umwance, awe ninsuka ninkota, kwaula kuti ndole kuno umusuma watala watazyelwa, nanti sile kuno ana yakwe yakupula cakulya.

²⁶ Insita ili yonsi akakumbusuka, nu kukongwesya antu yauze, ana yakwe yalaya apolelelwe.

²⁷ Uwafuntuka uku viipe, nga uwacita ni visuma, apakuti uce uwikalilile pee.

²⁸ Pano Yawe watemwa ivilungame, nupya asitazyela akwakwe yayo acumi, lelo aipe yene yalalowelela. Ana ya vipondo yalononeka.

²⁹ Antu aololoke yalikala umutende umu mpanga, nu kuipyana umuyayaya.

³⁰ Amazwi ya muntu musuma yakavwanga ivyamano, ni vikafuma pa lulimi lwakwe vikaya ivilungame.

³¹ Ilandwe lyakwe Leza, lyaya umu mwenzo wakwe. Ni ngazo zyakwe zitange zitale zisyetuke.

³² Icipondo cene cikacevya uwakaele, nu kulonda umwa kumukomela.

³³ Umwene nawe, atange aezye ukumusya wenga umu makasa yakwe umweneco, nanti ukumupeela umulandu umu cilye.

³⁴ Taila muli Yawe, uwalondela inzila zyakwe. Alakupeela amaka akupyana impanga, ulalola nakuno antu aipe yazingwa mwenemo.

³⁵ Naweni umuntu mwipe uwaitankanga, nu kuitongamika papela kwati umukelide uwaku Lebanoni.

³⁶ Lino napisileko nupya, awe nazanyile asipo. Inezya ukulondelezya awe cumi asi wakuloleka foo.

³⁷ Mwalolekesya umuntu musuma, mucecete umololoke umwenzo. Pano umuntu walongo awiyo akasya impyanyi zyakwe pano nsi.

³⁸ Lelo antu aipe yene yakapongelela sile pyu, kumwi ni mpyani zyao kwene.

³⁹ Yawe akapususya antu asuma, aliwe akayacingilila nu mu nsita zya ntazi.

⁴⁰ Umwene akayapususya nu kuyavwa, akayatuula, pano kuli aliwe akuno yakazina.