Masamu 36 - Amazwi Yakwe Leza 2013

Uyi wa muntu nu luse lwakwe Leza

¹ 1 Uyi ukalyolyosya umuntu umu mwenzo wakwe, cakuti wene kusi nu kusakamala kuli Leza nanti ukumukwatila icoopo.

² Wene akailola kwati wataluta yonsi, nu kwelenganya ukuti Leza atange amanye uyi wakwe, nu kupeela umulandu atange apelwe foo.

³ Ivilandwa vyakwe vyonsi iviipe nupya ivyaufi, icakuti atange ailuke nanti ukwiluka.

⁴ Lino aizi pa musanzi wakwe, ala akwelenganya sile inzila zya lufyengo zitupu. Imisango yakwe isi yampomvu. Wene asifuntuka ku uyi nanti lyonga.

Usuma wakwe Leza

⁵ We Yawe, ala uluse lwako lwafika nu mupela, umwiyulu nu ufumacumi wako wandatila nu mu makumbi.

⁶ Ulungami wako waya uzyantile wa myamba itali yakwe Leza. Imipingwile yako, nayo yaya wa kuzika kwakwe yemba. We Yawe, awewe ukawaka antu ni nyama kwene.

⁷ Iye mwe, vino uluse lwako lwazipa we Leza! Ana ya antu yakauwa umu cisao ca mapa yako.

⁸ Yene yakalya ivyakulya mpe, umu ng'anda umwako, iyikuta. Ukayamwesya nu mukaluzi ka nsansa zyako.

⁹ Umucumi intendekelo ya umi yaya kunuli, tukalola nu luswepo ndi cakuti watukozezya.

¹⁰ Twalilila uluse lwako kuli yao akumanya, nu ulungami wako kuli yao aswepe imyenzo.

¹¹ Utaleka ulwazo lwa cilumba lundyatole, utaleka antu yaipe yanzinganye ulwilo.

¹² Yakacita ya viipe yatiyalukuta nu kuilopola pansi. Nupya yene yatalatala yakatuke foo.