Masamu 35 - Amazwi Yakwe Leza 2013

Ipepo lyakulenga uwazwilizyo

¹ We Yawe umvwangile kweneko kuli yao yonsi akandemanizya, umvwangile kuli yao akansinkola.

² Wize ni cisyangu nga ni vyanzo kuti wize ungazwe.

³ Zunzula isumo na kazewe ka ulwi kuti ulwisye ati yankatukila. Si leka nuvwe kuno ukuti, “Ee, nkanize ne monsi monsi!”

⁴ Leka yayo akalonda ukunkoma yazewane, ni nsonyi ziyaleme? Na yayo akampingila nayo amano yayapele, yaswilile cundansizi!

⁵ Sileka yaye sile wakwe cungu akaululwa uku muza, lilyo lino umungeli wakwe Yawe aile akuyacocovya ulwilo.

⁶ Umu nzila yao muno yakupita, namo mufite fititi, nu kutelepa mutelepe lino umungeli wakwe Yawe afumile akuyasimuzya!

⁷ Nemo yakansonka sile lino yakunteya isumbo, na pakunjimbila polowe.

⁸ Kayale yapongelele sile ukwaula nu kwenekela, yalemwe nu mwi sumbo kwene lino yatevile aeneco kwene nu kuponela muli polowe wino yimvile aeneco kwene.

⁹ Alino nani namayanga nu luzango apamulandu wa vintu vino Yawe umweneco wacita. Namazanganga na pamulandu wakumpususya.

¹⁰ Umwili wane onsi umatakanga ukuti, “Kutaya nanti wenga uwaya wakwe wewe! Ukatulanya anyukuntike kuli yao amaka, alanda na ulilwe, kuli yao akatitikizya!”

¹¹ Yakambone yaufi nayo yatiyankatukila, nu kuntumpwila ivintu vino nemo ntamanyile.

¹² Yene yakundipila uyi apa usuma uno nacita, nga umwenzo wane iunyomelwa na malanda.

¹³ Lino yene yalwala, nemo nkazwala vyakuzwala vya ndosya, nu kulya inta nu kulya. Ala nkupepa ninamike nu mutwe umu mpamba zyane,

¹⁴ ungati wino nkupepela umwinane nanti cuza wane, lilyo ala nkuongoteka na pakupita kwati umuntu akulosya nyina.

¹⁵ Lino nali umu ntazi, yonsi pasi pakusansamuka. Yakongana ala yatiyanzinguluka, yakunsoweka. Na antu yauze nayo yiza umu kuntimbola.

¹⁶ Ala yakuncuzya, yakuncita wa ciwelewele, nu kundumila incecete.

¹⁷ We Mwene uzye mpaka lilaci, lino umalolekesyanga sile? Pususya umwenzo wane uku ukali wao, nu umi wane uwo uwaya sile onga, kuli yacisama yaa.

¹⁸ Namakuwanzyanga ukwi uvi likalamba, nu kukuwanzizya ukwi umba lya antu ilikalamba.

¹⁹ Utaleka anisi yane akapepa ufi yazange apamulandu wa kucimviwa kwane! Utaleka yao ampata ukwaula umulandu yansyenteka pamulandu nu landa wane!

²⁰ Imvwango zyao uku antu atemwa umutende, izya vyongo vyongo sile, nu kulondelezya sile inzila zyonsi umwa kuyatumpwila.

²¹ Yakanjasamwila ivilomo vyao ala yakuti, “Eya! Twaweni vino wacisile!”

²² We Yawe, ukailolela vivyo vyonsi, ali cino fwandi, utezya usuleko. Nupya utantazyela musambazi, utantaluka foo.

²³ Vwandamuka Mwene, kanzana, katuka we Leza wane, umvwangileko.

²⁴ We Yawe Leza wane wewe wacumi, fwandi mvwangile ndi vino nene muntu wakaele. Utaleka anisi yane ayano yaitanka panondi,

²⁵ Utaleka yavwanga yati, “Eya! Ali cino twalondanga! Asi papo lyene twamucimvya.”

²⁶ Yano yakasansamukila api syamo lyane, kayaye ni nsonyi uleke na mano yao nayo yayapele. Aikala kwati yanduta, leka insonyi ziyaleme, yazewane nu kuzewana!

²⁷ Yonsi yaya yano yali ni nsansa apamulandu wa ulungami wane, kayumile utupundu, yavwange nu kuti, “Yawe umukulu, akazangila apakusyuka kwa muzya wakwe.”

²⁸ Alino nani kwene namakulumbanya, we Mwene pano wewe mulungami, nu kukuwanzya, namakuwanzyanga umusanya onsi.