Masamu 34 - Amazwi Yakwe Leza 2013

Ulwimbo lwa kulumbanya usuma wakwe Leza

¹ Namawanzyanga Yawe insita zyonsi. Ntalatonta uku mulumbanya.

² Namamuwanzyanga pali vino wacita. Ali pakuti na yayo kwene yano yakacula, yuvwe kweneko, yasansamuke!

³ Katuwanzizye capamwi ukulu wakwe Yawe, katumulumbile ca pamwi!

⁴ Napefile kuli Yawe nawe wanjaswike, ampususya na kuli vyonsi ivya nsakamikanga.

⁵ Wiyo wensi akatumpwila amanso kunoli, akasansamuka ni nsonyi zitange zimuleme foo.

⁶ Umupina ndi akulila Yawe akamuvwa, nupya akamupususya nu ku macuzi yakwe yonsi.

⁷ Umungeli wakwe Yawe akacingilila yayo akamoopa, nupya akayapususya.

⁸ Muyuvwile mweisikulu mwenga usuma wakwe Yawe vino waya! Wasyuka wiyo akasimwilila kunoli.

⁹ Mwaya ni coopo kuli Yawe, mwe antu yamuzilo mwensi. Pano yayo akaoopa Yawe, yatuulilwa icintu nanti cimwi.

¹⁰ Nanti angala yacisama yakatemboka uku nzala, lelo yayo afukilila Yawe pasi nanti cimwi cisuma cino yene yanguulilwa.

¹¹ Izini kuno yayame, mwize muvwe. Nemo namamusambilizya ukukwatila Yawe icoopo.

¹² Uzye mwemo mukulonda ukuilyokezya pano nsi? Uzye mukulonda ukulengela pano nsi nu kusansamuka penepo?

¹³ Tiini fwandi ukulanda iviipe, mute nu kutumpoka intumpu.

¹⁴ Tiini ukucita iviipe, mwacita sile ivisuma. Mwatemwa ukwikala umu longo, nu kwikala kwene avino mwikale.

¹⁵ Yawe aliwe ali kalinda wa ana asuma, nupya wene akauvwa ni nkuta zyao.

¹⁶ Lelo wene antu yayo akacita iviipe, yene akayafutatila icakuti na antu yao nayo kwene iyasuka iyayilila.

¹⁷ Antu asuma ndi cakuti yapunda yati, “Tutulwe!” Yawe akayuvwa nu kuyatulanya ku macuzi yao yonsi.

¹⁸ Yawe akaya umupipi sana na yayo ati yaputuka imisana. Wene akapususya antu yano yati yapelelwa amano.

¹⁹ Ivikacula umuntu musuma ala ivingi wakwe cimwi. Lelo Yawe akamupususya kuli vyonsi sile.

²⁰ Yawe akawakilila amafupa yakwe yonsi pyu. Patangepaye nanti lyonga ilya kuvunika.

²¹ Uyi ali uno ulakoma umuntu mwipe. Antu yano yapata umuntu musuma, nayo yalacilola.

²² Yawe aliwe amatulanyanga aomvi yakwe. Icacumi antu akazina kunoli yalapusuka.