Masamu 33 - Amazwi Yakwe Leza 2013

Ulwimbo lwa kulumbanya Leza

¹ Mwensi mwe ya myenzo isuma, mwasansamuka apamulandu wa vintu vino Yawe wacita. Mwamulumbanya mwemwe mwensi mwe muno mukumuzumila.

² Lumbanyini Yawe umwi zeze, mulumbanyini muli banjo.

³ Mwimbilini ulwimbo lupya, lwakumucindika. Mulizye ingoma zinu usaka usaka, muumile na kapundu.

⁴ Amazwi yakwe Yawe yaya alungame, na vyonsi vino akacita vyaya ivilungame.

⁵ Watemwa usuma nu ulungami. Impanga yazulamo ukutemwa kwakwe ukwa pe.

⁶ Yawe wapanzile amayulu ukwizwi lyakwe. Ilanzi, umwezi ni ntanda, navyo vyapangwa uku mupu wamu kanwa kakwe.

⁷ Wakolonganike amanzi yamuli yayemba, kwati umu ncende yonga, kwati umu nyambi. Nga alino wasunga amanzi yamu maziya pamwi.

⁸ Opa Yawe, we nsi yonsi! Oopini Yawe mwe antu yonsi amu nsi!

⁹ Lino wavwanzile sile insi ipangwa. Ukwi zwi lyakwe sile ivintu vyonsi iviyako.

¹⁰ Yawe akaonona nu kuvulunganya amapange ya ikala nsi. Akavulunganya nu kupasola amapange ya mitundu.

¹¹ Uteyanyo wakwe Yawe wene ulasyalilila pee. Amelenganyo yamu mwenzo wakwe, yene yalasyalilila amanda yonsi.

¹² Wasyuka umutundu uo uno Yawe wasolwile. Ukuya ali Leza wao, yano wasolwile ukuya icuma cakwe.

¹³ Yawe wa mwiyulu akatamba, nu kulola ana ya antu yonsi.

¹⁴ Umwi sano kwene muno Umwene akaikala, ali muno akalolekesya pali yonsi akaikala pano nsi.

¹⁵ Aliwe kwene uwapanzile imyenzo yao onga onga. Wene akaceceta ni vicitwa vyao vyonsi.

¹⁶ Uwingi wa vita usipususya Umwene foo. Umucindami nawe, avivyo kwene, asiipususya uku maka yakwe foo.

¹⁷ Imfwalasi itange iye iya kutailako apakupusuka foo. Amaka yakweyo atupu yatange yakutuule foo.

¹⁸ Lelo Yawe akawaka yayo akamuyela, yayo ataila mu kutemwa kwakwe ukwa pe.

¹⁹ Wene akayatuula ku mfwa, nu kuyasunga ningo umu nsita ya cipowe.

²⁰ Utailo witu waya muli Yawe. Wene ali kazwa witu na kacingilila witu.

²¹ Muli aliwe umwayela insansa zitu, nu mwi zina lyakwe ilyamuzilo amuno twataila.

²² Mwene, sangala sile ukutemwa kwako ukwa muyayaya kwalukuya sile naswe, ndi muno twatailila.