Masamu 31 - Amazwi Yakwe Leza 2013

Ipepo lyakutaila Leza

¹ Nazina kunuli we Yawe, ni nsonyi zitakundema foo. Untuule pano wewe wa ulungi.

² Teya amatwi kunondi, kalauka ungavwe! Uye Ciliwe cane ni linga lyane ilyakupusukilamo.

³ Pano wewe ciliwe cane ni linga lyane. Ali cino fwandi, apamulandu wi zina lyako, undangilile nu kuntungulula ndi muno walaila.

⁴ Umfumye umu citeyo cino yatiyanteya. Wewe uli cisao cane.

⁵ Nafumbatika umwenzo wane umu makasa yako, sungala untuule we, Yawe, Leza wacumi.

⁶ Wemo wapata yayo akapepa utuluwi. Lelo nemo, nataila sile muli we Yawe.

⁷ Namasangalalanga nu kuzanga apa luse lwako, pano wewe walola mpiti ulanda wane, nu kumanya, wamanya mpiti ulanda wa mwenzo wane.

⁸ Utantazyela foo, nanti uku nsumbila umu makasa ya anisi yane. Lelo waleka ukuti naipitila sile nenga ukwitolo.

⁹ Ya na mizu kunondi, we Yawe, pano nemo indi umu ucuzi. Ukulilizika kwane kwatikumvimvya amanso, umwili wane nu mwenzo wane vikunyunguluka.

¹⁰ Amalanda yatiyalenga umi wane ukupomponteka, nu kulosya kwati kwipimpazya imyaka yane. Natintemboka pamulandu na malanda, nga namafupa yane nayo yatiyasokonteka.

¹¹ Anisi yane yonsi, makamaka ainipamba, yene yakansausya. Na yayo amanya yakundeoka. Nga yandola sile umu museo, yutuka!

¹² Umuntu wensi watanjilila, ungati nene musipwa. Indi wa ciinga cino yatiyasumba apa citumba.

¹³ Nkuuvwa kuno anisi yane aingi yakutotozana, Yene yakungoofya monsi monsi. Yene yakumpangila, yakumana akapi kuti yankome.

¹⁴ Lelo nemo nataila muli wewe, we Yawe, nupya nkuvwanga inti, “Wewe uli Leza wane.”

¹⁵ Umi wane onsi waya umu minwe yako. Umpususye uku minwe ya anisi yane, yakwe yayo akancuzya.

¹⁶ Sangala undole luseluse ne muzya wako. Untuule umu kutemwa kwako ukwa pe.

¹⁷ Nkukuta kunuli, we Yawe, utaleka insonyi zindeme. Lelo leka insonyi zileme yao aipe, yatelemukile cimyamya kuzimo!

¹⁸ Myalalika utunwa twao, yaye a yaciulu, pano twanenolanga cilumba cilumba uwakaele.

¹⁹ Iye mwe, we Yawe vino usuma wako wakula, uno ukacitila yayo akukwatila icoopo! Ala kwene icakuzunguka uku muntu ali wensi, apakulola vino wemo ukacitila yao akutaila, yano yakaiza umu kuzina kunuli.

²⁰ Ukayasungilila kunuli, nu kuyacingilila uku mapange aipe a antu. Ukayasunga umwi cele lyako, nu kuyafuntusya uku ntusi zya anisi yao.

²¹ Lumbanyini Yawe! Pano wene wandanga uluse lwakwe ulwa kuzunguka lilyo lino anisi yanzingulwike nu kunzanza.

²² Nemo umu ntete walanga nkwelenganya inti, “Yatiyamfuntusya uku cinso cako.” Lelo wemo uvwile ukukuta kwane, lino nalaizye tutulwe.

²³ Si mwalukutemwa Yawe, mwe aswepe yakwe mwensi. Yawe akawaka aufuma cumi, lelo wene akavunuka antu acilumba.

²⁴ Muposye nupya muzyansye, mwensi mwe muno mwataila Yawe!