Masamu 30 - Amazwi Yakwe Leza 2013

Ipepo lya kutaizya uku muntu uwapupuzuka

¹ Namakulumbanya we Yawe, pano awewe wati untuula. Utalesile kuti anisi yane yaitanka pali nene.

² We Yawe Leza wane natinkulaizya, nga nawe watumpozya.

³ We Yawe, watufumya umwenzo wane ku mfwa, watumfumya muli yayo akaya ukwi lindi, nu kumbwezezya uumi.

⁴ Lumbanyini Yawe umu nyimbo, mwe muno mwamutemwa. Iusini ivicitwa vyakwe wiyo Uwamuzilo, nu kumutaizya.

⁵ Pano ukali wakwe uwapa kasita sile akanono. Uluse lwakwe lwene ulwa muyayaya. Amanguzi uli na minsozi, lelo akatondo upunda nu luzango.

⁶ Nga lino nali ni syuko, navwanzile nati, “Ntalatala nje ni ntete!”

⁷ We Yawe, ala uluzango lwako lwantongamika apa mwamba ukome, ndi wamfutatila lyene nani pasi pantete.

⁸ We Yawe nalaizye kunuli, nu kulenga uluse lwako we Leza wane.

⁹ Uzye uwazi wane ivyani vino ungakuzipila, ndi cakuti natenzi umwi lindi? Uzye ndi nasanguka ulukungu, ningakulumbanya nu kutakola icumi cako?

¹⁰ Sungala unguvwe, we Yawe! Ya na mizu kunondi! Ungazwe, we Yawe!

¹¹ Awewe ukasenula impoma yane ukuya iciila ca nsansa. Ukanzula umupango wa ndosya nu kunjika umu nsansa.

¹² Ali pakuti umwenzo wane ukulumbanye ukwaula ukutonta. Caleka we Yawe Leza wane namakuwanzyanga amanda yonsi.