Masamu 29 - Amazwi Yakwe Leza 2013

Izwi lyakwe Leza mu cipangalansya

¹ Pelini Yawe umucinzi mwe ana yakwe Leza, mupelini umucinzi na maka!

² Pelini Yawe umucinzi, ulingine ni zina lyakwe, cindikini Yawe umwi sano lyakwe ilyamuzilo.

³ Izwi lyakwe Yawe likuvwika pali yayemba. Leza wa lulumbi, umucindami akupangalansya, Yawe akuuvwika wa kupanta kwa mvula pali yemba mukulu.

⁴ Izwi lyakwe Yawe ilya maka, izwi lyakwe Yawe ilya lulumbi.

⁵ Izwi lyakwe Yawe lyakontola imiti imikelide, umwene wakontola imiti imikelide yaku Lebanoni.

⁶ Wene waleka imyamba yaku Lebanoni ukucena wa kana ka ng'ombe, ni myamba yaku Hemoni ungati akana ka mbo.

⁷ Izwi lyakwe Yawe likumyantusya imvula.

⁸ Izwi lyakwe Yawe likupunganya imitengo, umwene akupunganya ulwanga lwaku Kadesyi.

⁹ Izwi lyakwe Yawe likusunkanya imiti, imisufi, likuleka na mafwa ukupululuka, icakuti mwi sano lyakwe yonsi yakupunda iyati, “Kawala Musambazi!”

¹⁰ Yawe aliwe akateeka yayemba yonsi, nupya wene wikala pa cilimba cakwe ca wene umuyayaya.

¹¹ Yawe aliwe akapeela antu yakwe amaka, nupya akapolelela antu yakwe upolelelo wa longo.