Masamu 27 - Amazwi Yakwe Leza 2013

Aya na Leza kusi cino yangoopa

¹ Yawe ali luswepo lwane na katuula wane, kusi cino ningoopa. Yawe akantuula kuli vyonsi ivya uzanzo, fwandi kusi wino ningoopa.

² Antu aipe ndi cakuti yankatukila, apakuti yankome yakapempezyoka, nu kuiponela sile yonga.

³ Nanti sile iumba lya vita lyankatukila, nemo ntange nuvwe ni ntete. Nanti sile anisi yane yanzanza, nemo indataila sile muli Leza.

⁴ Nalenga icintu conga kuli Yawe cico sile cino nkalonda icakuti ningaikala, umu Ng'anda yakwe Yawe, amanda sile yonsi aumi wane, nu kulasyukila usuma wakwe Yawe, alino nu kuleka aliwe sile ampanda amano umu Ng'anda yakwe.

⁵ Umu nsita ya mazanzo, aliwe akansunga umu mutanda wakwe. Aliwe akamfisa umu Ng'anda yakwe ikulu nu kuntongamika apapelapela ya ciliwe.

⁶ Lyene nati ntumpula nu mutwe apapelapela ya anisi yane, yayo ati yanzinguluka, lyene nemo inkutokowalika sile insingo apapela nu kupunda nu luzango apa kutuula impolelwa umwi sano lyakwe. Alino nu kwimbililila Yawe inyimbo zya kumulumbanya!

⁷ We Yawe, si angala uvwe ukupunda kwane! Ya na mizu kunondi nu kungasuka!

⁸ Watulaizya kunondi uti, “Ndanga kunondi.” Ee we Yawe, fwandi ali cino niza.

⁹ Fwandi utafisama kunondi! Utansokela, utatazyela umuzya wako. Lyonsi ukangazwa, utansya nenga nupya utantazyela, Mwene Leza wane, Katuula wane!

¹⁰ Tata na mayo limwi yangansya, lelo Yawe alansunga.

¹¹ Nsambilizye, we Yawe, vino ukasi kuti incite, nu kuntungulula umu nzila nsuma, pano anisi yane anyanya.

¹² Utasya wamfuntwila uku anisi yane, pano yene yangankatukila ni vyakuntumpwila nu kungoofya.

¹³ Ukuya kwene nemo nazumila ukuti ndikala pano nsi, mpaka sile ince ndole usuma wako we Yawe.

¹⁴ Ali cino fwandi, mwataila muli Yawe! Mukwate upaalilo, mutezya mwatovoka foo. Ee, cacumi, mwataila muli Yawe!