Masamu 25 - Amazwi Yakwe Leza 2013

Ipepo lyakutungululwa nu kucingililwa

¹ Kunuli we Yawe akuno natuula ipepo lyane.

² Muli wewe, we Leza wane, amuno nataila. Utaleka insonyi zindeme. Utaleka anisi yane yaitanka pali nene!

³ Yonsi akataila munuli yatalazewana. Lelo yayo akakusangukila zuwazuwa, ali yano insonyi zilalema.

⁴ We Yawe, unsambilizye inzila zyako. Undondolwele nu tumakula twakwe tondo kwene.

⁵ Untungulule nu kunsambilizya ukwikala mu vyacumi vyako, pano wewe uli Leza wane, wino akantuula. Wewe nataila amanda yonsi.

⁶ We Yawe, iusya uluse lwako nu kutemwa kwa pe kuno wakwata ukufuma ku mpiti.

⁷ Utaiusya amaifyo yane yano nacisile umu wance wane. Uwanjiusya luse luse, ukulingana nu usuma wako.

⁸ Yawe uwa luse akalungika, ali cino nayakaifya akayalanga inzila.

⁹ Akatungulula aicefya umu nzila nsuma, nu kuyasambilizya ukulonda kwakwe.

¹⁰ Inzila zyonsi zyakwe Yawe ulukundo ni cumi yayo akusunga upangano wakwe na masunde yakwe.

¹¹ Pamulandu wa kucindamika izina lyako, We Yawe, unjelele amaifyo yane, pano yene yavulisya.

¹² Yayo akwatila Yawe icoopo, akayalangilila inzila umwakulondela.

¹³ Yene yalaya nu longo lyonsi, nu luko lwao lulaikwatila impanga umwakwikala

¹⁴ Yawe akasokolwela inkama zyakwe kuli yao akamoopa, nu kuleka upangano wakwe umanyike kunoyali.

¹⁵ Nkalingamila kuli Yawe kuti angazwe, nawe akampususya ku mazanzo.

¹⁶ Senukila kunondi, we Yawe, uye na mizu kunondi pano nazukilwa nupya natintemboka.

¹⁷ Sisya amasakamiko yane, untuule ku ntazi zyane zyonsi.

¹⁸ Elenganya apa ntazi nu kucula kwane, nu kwelela amaifyo yane yonsi.

¹⁹ Silola vino anisi yane yatiyavula, na vino yansokela wakwe cimwi!

²⁰ Uncingilile nu kuntuula! Utaleka inkuvwe insonyi, pano niza nazina kunuli.

²¹ Si angala usuma na ucumi wane vile vincingilile, pano nemo nasintilila munuli.

²² We Leza, ukulule antu yako aina Izlaeli, uku ntazi zyao zyonsi!