Masamu 22 - Amazwi Yakwe Leza 2013

Ukulila kwa kunyunguluka nu lwimbo lwa kulumbanya

¹ Leza wane, Leza wane, uzye icani cino wantazyela? Nkula nkulaizya ntulwe, lelo kusi kukalauka ukungazwa!

² Leza wane, muno nali nkupunda kasanya konsi lelo ukwaula kuti ungasuke. Nanti usiku kwene, ntange indole utulo!

³ Lelo kwene wewe uli Leza, wiyo wino aina Izlaeli yakalumba.

⁴ Ni vikolwe vitu kwene, awewe vyatailanga, nawe wayatuulanga.

⁵ Awewe vyalililanga nawe ala ukuvipususya. Vyakutailanga nga vitaicuzizye awe.

⁶ Lelo nemo nene mombololo sile nga insi muntu foo. Nasaaluka apa antu nu kusulwa na ali wensi.

⁷ Yonsi yano yakandola yakanseka, yakamfyola ala yakupukunya ni mitwe iyati,

⁸ “Wataila muli Yawe, ale lyene Yawe kakutuule tuvwe! Leka wene akukulule, pano akazangila munuli.”

⁹ Ala awewe kwene wamfumizye umunda muli mayo, nga lino nali akanya, wancingilile.

¹⁰ Ukufuma sile uwance wane nkasintilila munuli, nga awewe sile uli Leza wane lyonsi.

¹¹ Utafuntuka kunondi! Ala intazi ili umupipi, nga pasi nanti umwi uwakungavwa.

¹² Anisi nyanya, yatiyandizizya wakwe yacipambasi ya ng'ombe. Yali kwati a yacipambasi ati yafulika aku Basyani.

¹³ Yatiyangasamila utunwa wakwe yacisama, akulila nu kulumanya incecete apakuti yandepole.

¹⁴ Nemo natintemboka, lyene nkwituluka sile wa manzi. Na mafupa yane nayo yatiyafyontoka. Umwenzo wane ukoline ipula, ilyatilisunguluka.

¹⁵ Icikolomilo cane caticuma wa lukungu, nu lulimi lwane lwatilulematila ku kanwa. Watunsya wa mufwe umu lukungu lwa mfwa.

¹⁶ Icikundi ca antu caticindizizya, yali kwati akapukutu kakwe yasimbwa. Yatiyanyenkola amaulu na makasa yane

¹⁷ Amafupa yane yonsi yangaloleka. Anisi yane yakundolekesya nu kuntamba.

¹⁸ Yakutakanya insalu zyane, nu kulwila umwingila wane, ali pano yakupendolela.

¹⁹ Utafuntuka kunondi we Yawe! Iza zuwa unkulule we maka yane!

²⁰ Mpususye uku lupanga, mpususye kuli yasimbwa yayo

²¹ Ntuule kuli yacisama yaa. Namaifwila sile kuli yacipambasi ya mpanga.

²² Namalandilanga antu yane ululumbi lwako. Namakulumbanyanga lyonsi umu kukongana kwao.

²³ Namavwanganga inti, “Lumbanyini Yawe, mwemuno mukamoopa. Mwamucindika, mwe luko lwakwe Yakobo. Mwamoopa, mwe ina Izlaeli mwensi.

²⁴ Pano wene asitazyela apina nanti kuyasuula. Wene asifuntuka kunoyali foo, lelo akaasuka lino yene yapunda ntulwe.”

²⁵ Mwene Leza awewe namalumbanyanga umu ukongano ukalamba pamulandu ni vintu vino wacita. Apa manso ya antu akamfukilila ali pano nemo namakupelanga impolelwa ino nakulavile.

²⁶ Apina yalalya pano yatemilwe aeneco, na yano yakalonda Yawe nayo yalamulumbanya. Si angala yaye nu longo amanda pe!

²⁷ Antu amu nko zyonsi yalaiusya Yawe nu kuweluluka yalaweluluka kunoli. Ni misango ya antu yonsi yalamupepa.

²⁸ Pano Yawe ali kateeka kwene. Ali wino wateeka na antu amu nko zyonsi.

²⁹ Antu yonsi acilumba yalamufukamila, Yonsi akafwa yalamufukamila. Yayo atangaisunga kuti yaye nu umi.

³⁰ Amu mikulo yamu manda akwiza yalatumikila Yawe. Yene yalalanda imilandu ya Mwene ku mikulo ikwiza.

³¹ Antu yano yatacili yavyalwe yalanenwa vii, “Yawe watuuzile antu yakwe.”