Masamu 20 - Amazwi Yakwe Leza 2013

Ipepo lyakulenga ucimvyo

¹ Sangala Yawe akwasuke lilyo lino wasakamikwa! Sangala Leza wakwe Yakobo akucingilile!

² Sangala akwazwilizye ukufuma uku Ng'anda yakwe ikulu, akutungilile ukufuma uku Zioni!

³ Sangala apokelele uwila wako onsi uno watuzile, nu kuzangila mu mpolelwa zyako zyakoca!

⁴ Sangala akupeele vyonsi vino umwenzo wako ukakumbuka, akupeele nu longo muli vyonsi vino ukapanga ukucita,

⁵ Lyene tuce tupunde ni nsansa apakucimvya kwako nu kutumpula imendela umwi zina lyakwe Leza witu. Sangala Yawe ale akupeele vyonsi vino walenga!

⁶ Lyene namanya ukuti Yawe akapeela ukucimvya uku musololwe wakwe. Wene akamwasuka ukufuma umwakwe umupela umwamuzilo, nu ku maka yakwe akulu amupeela ucimvyo ukulu.

⁷ Yamwi yene yataila umu maceleta na yamwi umu mfwalasi yao. Lelo swemo twataila mwi zina lyakwe Yawe Leza witu!

⁸ Yene yalapumika nu kupona pansi. Lelo swemo tulimilila sika nu kuzyansya!

⁹ We Yawe, azwilizya umwene kuti acimvye. Ungala uce utuvwe lilyo lino tulalaizya kunuli.