Masamu 19 - Amazwi Yakwe Leza 2013

Ululumbi lwakwe Leza umu uumbo onsi

¹ Amayulu yakalanda apa lulumbi lwakwe Leza, Ulwelele lukaalazya apa lwalala vicitwa vya minwe yakwe!

² Cila kasanya kakalandila kasanya kauze icintu cii. Cila usiku nao ukaswilizya ukulandila usiku uze icintu cii.

³ Kutaya ukulanda nakuze nanti amazwi akuvwanga. Kutaya ni izwi lyakuvwika.

⁴ Ukuvwika kwa viko kukaya umu nsi yonsi. Na mazwi yaviko yakalimba uku mpela ya nsi. Wakuulila ilanzi umwakwikala umwiyulu.

⁵ Ali muno likatunka ungati asiwinga umuzange, wino akufuma umwakwe, ungati umuntu akucimvyanya mu kusimula ulwilo ni nsansa.

⁶ Likatunka uku mpela yi yulu, ilipita ukufika nu kumpela yuze. Kutaya nanti conga icisiuvwa ukukaya kwaliko.

Masunde yakwe Yawe

⁷ Amasunde yakwe Yawe yaya alungame. Yakapeela umi upya. Upinguzi wakwe Yawe uwa cumi. Ukapela amano kuli yao akayalonda.

⁸ Amalamulo yakwe Yawe yaya alungame. Yao akayalondela yakasansamukila mwenemo. Amasunde yakwe yaya atunguluke, yakatungulula umupasi, nu kunjilula ningo.

⁹ Ukoopa Yawe kwazipa nupya kukaikalilila pe. Ivikapingula Yawe ivyacumi, vyonsi pano vyapela vyalungama

¹⁰ Nupya ivyakukumbwa ukuluta na pali zaabu, nanti a zaabu kwene umuzipisye. Amazwi yakwe yalyompa ukuluta nu uci, ukuluta nu luto ulukatona kuli kanacisenga.

¹¹ Ali muno ne muomvi wako inkapula amano nu kuyawaka. Umu kuyalondela ali muno ndapokelela ni cilambu icikalamba.

¹² Kusi umwi angailolela ukuluvyanya kwakwe. Fwandi ungala umfule uyi wane uno wafisama!

¹³ Ncingilile ukucilumba ca palwalala. Utaleka cinteke uzya. Lyene indaya umwi uwakaele, uwaula iifyo ilikulu.

¹⁴ Sungala upokelele amazwi yapa kanwa kane, na melenganyo amu mwenzo wane. We Yawe, we ciliwe cane na katuula wane!