Masamu 16 - Amazwi Yakwe Leza 2013

Ipepo lya kulenga upalilo uku Mwene Leza

¹ Leza nsunga, pano niza nazina kunuli!

² Nanena Yawe nati, “Wewe uli Mwene wane. Wewe uli cuma cane pasi namuze.”

³ Kuli yayo akaele aya muno nsi, ali yacindame yane yano nemo nkazangilamo.

⁴ Yayo akapamviwa ukupapata tuleza utuluwi, yakailetela sile intazi. Nemo ntalatala nezye ukutuula impolelwa ya wazi nanti ukupepa tuleza twao tuto.

⁵ We Yawe, wewe uli vyonsi vino nakwata nu kumpela ukampela vyonsi vino nkalonda. Umi wane uli umu minwe yako.

⁶ Iye mwe vino uwila wako ukanzungusya, pasi pa usuma mwe!

⁷ Nalumbanya Yawe, wiyo akampanda amano. Umwenzo wane ukanceula nu usiku kwene.

⁸ Lyonsi nkumanya ukuti Yawe ali panondi, ali pipi ukwi kasa lilunji lyane, fwandi kusi icingantenkanya.

⁹ Caleka umwenzo wane uli ni nsansa, na mazwi yane aluzango pano nanti angala nene mwina kufwa umwili wane nao utakweti icifinya mwili.

¹⁰ Pano wemo utalansya mwi lindi, nanti kuleka muomvi wako umukundwe akalole ukuola.

¹¹ Uwandanga inzila zyakuntwala ku umi, nga nani ndazanga cuze lino wemo waya pipi nani. Ulandetela isyuko ilyakunzanzya, amanda pe.