Masamu 15 - Amazwi Yakwe Leza 2013

Vino Leza akalonda antu yacita

¹ We Yawe, uzye aweni alingila umwi taalu lyako? Uzye aweni alikala apa mwamba wako uwamuzilo?

² Awiyo akapita uwakaele, wiyo akacita ni vilungamane, wiyo akavwanga ivyacumi vyamu mwenzo wakwe.

³ Awiyo wino ululimi lwakwe lusitumpoka, wiyo asicita iviipe uku muze nanti ukuletela umuze umuzewanya.

⁴ Awiyo wino akalolekesya umwipe ni misuula, lelo akacindika nu kutontela Leza. Wino ndi walapa asifutuka, nanti angailetelela umweneco.

⁵ Wiyo asilonda ukukwilila umu mpiya zino wakongwesya. Wiyo asipokelela amafukakanwa pakuti yafyenge uwakaele. Muntu wino akacita ivintu vii, pasi icintu nanti conga icingamuponya.