Masamu 148 - Amazwi Yakwe Leza 2013

Ulwamo lwa uumbo onsi ku kulumbanya Yawe

¹ Lumbanyini Yawe! Lumbanyini Yawe mwe ikazi amwi yulu, mulumbanyini mwemuno mwikala apa sanzame!

² Mulumbanyini mwe angeli yakwe yonsi, mulumbanyini mwe vita vyakwe vyonsi vya mwiyulu.

³ Mulumbanyini mwe lanzi nu mwezi, mulumbanyini mwe ntanda zyonsi iziyengese!

⁴ Mulumbanyini mwe mayulu, aya papelapela na mwe manzi aya papelapela.

⁵ Kavilumbanye izina lyakwe Yawe, pano wene wapile ilamulo, nga navyo iviumbwa.

⁶ Wene walenga kuti vyaikala umu ncende zyaviko, ukwi lamulo lyakwe lya manda pe.

⁷ Lumbanyini Yawe mwemuno mwikala pano nsi, mwe vinyama vyamuli yemba, anono na akulu,

⁸ mwe nkuwa ni mvula yamawe, mwe cuma na mwe kungwi, na mwe cipunga mwe muno mukayela ilamulo lyakwe.

⁹ Mulumbanyini, mwe myamba nu tulundu tulundu tonsi, imiti ya viseekwa ni mikelide,

¹⁰ mwe nyama zya mpanga na mwe viteekwa, mwe nzoka ni vyunyi ivikapapuka.

¹¹ Mwe yene ya pano nsi na mwe mitundu yonsi, yakateeka ni ntunguluzi zyonsi zya pano nsi.

¹² Mwe yalumendo na akazyana, mwe yakote na mwe yance.

¹³ Kayalumbanye izina lyakwe Yawe, pano izina lyakwe lyonga mpo, ali lino lyacindamisya, lyaluta insi ni yulu uku ucindami.

¹⁴ Wene walenga antu yakwe ukuya na maka, apakuti aswepe yakwe yonsi yamulumbanya. Ali ina Izlaeli, yano watemwisya wakwe cimwi! Lumbanyini Yawe!