Masamu 147 - Amazwi Yakwe Leza 2013

Ukulumbanya Leza Wamaka yonsi

¹ Lumbanyini Yawe! Ukulumbanya Leza witu mu nyimbo kwazipa. Icansambu nupya calinga ukumulumbanya.

² Yawe alakuululula Yelusalemu cipya cipya. Wene alawezya na ina Izlaeli aali umu uzya.

³ Aliwe alapozya imyenzo yakwe yayo aculisye, alayanyepela ni vilonda vyao.

⁴ Wapima impendwa ya ntanda, wazitemela na mazina longa longa.

⁵ Umwene witu umukulu nupya uwamaka. Amano yakwe amuntapimwa.

⁶ Wene akakatusya aicefya, lelo aipe yene akayasyunola mpaka ku lukungu.

⁷ Imbilini Yawe inyimbo zyakumutaizya lizizini Leza witu izeze.

⁸ Aliwe akavimba iyulu na makumbi, aliwe akapeela insi imvula, nu kumezya umulemvwe umu myamba.

⁹ Akapela uku nyama ivyakulya vyakwezyo, nu kulisya ana yakwe yamwankole nga yalila.

¹⁰ Wene asizangila mu maka ya mfwalasi, nanti ukusansamukila mu muntu wa lwilo.

¹¹ Lelo Yawe akasansamukila muli yayo akamucindika, muli yayo ataila mu kutemwa kwakwe ukwa pe.

¹² We Yelusalemu, lumbanya Yawe! We Zioni, lumbanya Leza wako!

¹³ Pano wene akakomya imikolongelo ya mpongolo zyako. Wene akapolelela na ana yako.

¹⁴ Waleta umutende mu mipaka yako, nu kukwikusya uku ngano izisuma.

¹⁵ Wene akapeela ilamulo uku nsi, nga vino walanda zuwazuwa vicitika.

¹⁶ Akafumilizya cuma ungati amavumbu ya mfwele, nu kusansata impepo api sote wi twi.

¹⁷ Akatonyezezya imvula ya mawe, ungati ulukusi wa mukate. Fwandi aweni angazizimizya impepo yakwe?

¹⁸ Lyene ndi cakuti wavwanga, nga imvula ya mawe isunguluka. Wene akakatusya cipupu, nga amanzi iyaapita!

¹⁹ Akapeela ilandwe lyakwe ku antu yakwe, amasunde yakwe na malamulo yakwe.

²⁰ Atatala wacita vivyo uku mutundu uli onsi, yene yatamanya amasunde yakwe, awe. Lumbanyini Yawe!