Masamu 140 - Amazwi Yakwe Leza 2013

Ipepo lyakulenga ukucingililwa

¹ We Yawe, untuule ku muntu mwipe, unsunge uku muntu umukangu.

² Yao akwelenganya ivyaipa umu myenzo yao, yakusongelekanya ivikanza insita zyonsi.

³ Yasongola indimi zyao wa nzoka, yakwata usungu umu tunwa twao wa nondo.

⁴ We Yawe umfuntusye uku minwe ya mwipe, umpususye uku antu akangu, yao akampangila kuti yampalusye umu nzila isuma.

⁵ Acilumba yanteya ulukose umu umfisolo, yanteya inkose zyakuti nkalemyeko, yika ivisiki umu nzila ivyakuti nkapumikeko.

⁶ Nanema Yawe nati, “Wewe uli Leza wane.” Uvwa izwi lyane kuno nkukupapata.

⁷ We Yawe Simwandalali, umukuluzi wane uwamaka, awewe ukancingilila umu wanda wa ulwi.

⁸ We Yawe, utaleka antu aipe yafikilizya amapange yao! Utaleka yakwate ulongo muli vino yampangila.

⁹ Napa mutwe wakwe yao akandizizya cilumba cilumba, leka amapange yao pali nene yayafutukile alio kwene.

¹⁰ Leka amakala ya moto yayaponele, uyasumbile umu ciwina ca manda pe.

¹¹ Leka ukuti kavwanga wa viipe atakafikilizye amapange yakwe, leka ukuti amulomo yatakalengele muno nsi.

¹² Namanya ukuti Umwene alapeela akafyengwa insambu, nu lungi uku alanda.

¹³ Nakacendi, aololoke yalataizya izina lyako, aololoke yalaikala kunuli.