Masamu 139 - Amazwi Yakwe Leza 2013

Leza aliwe wamanya vyonsi nu kuvisunga

¹ We Yawe, wanjezya nu kumanya wamanya.

² Wamanya vyonsi vino nkacita. Ukamanya vino nkwelenganya, nanti uli akatalamukila uli.

³ Ukacevya imiombele yane, ndi cakuti inkuomba nanti inkupuza. Wamanya ivicitwa vyane vyonsi.

⁴ Lino izwi litacili liye apa lulimi lwane, ala watumanya mpiti vino namavwanga.

⁵ Wanzinguluka konsi uku nkolelo nu kucisila. Fwandi wancingiilila na maka yako.

⁶ Amano yako pali nene, akuzunguka nupya nkaposiwa ukutezya, yakulisya intange nkumemo.

⁷ Nga aukwi fwandi kuno ningaya apa kuleuka Mupasi wako? Aukwi kuno ningalungama apa kuifuntusya uku cinso cako?

⁸ Nga nalungama ukwiyulu, akunuli, vyonsi nga ningati inje nkalale kuzimo, akunuli.

⁹ Nanti ningazwala amapa, impapuke inje uku ufumondaka, nanti ukutali sana uku uwondaka,

¹⁰ nako kwene ikasa lyako lilaya kweneko, nu kuntwala alino lilantwala nu kundemelela.

¹¹ Vyonsi sile nanti ningati, “Imfinzi kaino imfise nanti uluswepo kalusanguke usiku uwakunzinguluka,

¹² lelo imfinzi nayo isi ifite kunuli, nu usiku nao ulawala wa kasanya.

¹³ Awewe wapanzile imfyo zyane, wewe wampikolizye umunda muli mayo.

¹⁴ Nkukutaizya pa vizungusyo vyonsi vii, na pali vyonsi vino indi nemweneco, na pavizungusyo vya vicitwa vyako. Wamanyikisya umwenzo wane ningo ningo.

¹⁵ Lino amafupa yane yapangangwa ningo ningo umu umfisolo umunda muli mayo,

¹⁶ wemo wambweni calimwi lino ntacili mvyalwe, na manda yonsi yalemvilwe nu kupimwa pali nene umu lupapulo lwako. Vyonsi vyalemvilwe nu kupimwa calimwi ala manda yatacili yayepo nanti onga.

¹⁷ Leza, ala imyelenganyizizye yako, yatala ukuvwa nupya asi yakupenda foo.

¹⁸ Nga nati nkanjipende, awe cumi yavulisya ukuluta umusensenga, nanti ningezya ukupenda likwene lino tuli nawe.

¹⁹ We Leza ulakoma aipe! Senkini pano mwe antu mwe muno mukalonda ukuzwisya uwazi!

²⁰ Yakavwanga ivya musalula kunuli, yasuula ukwelenganya kwako iyati ukwa sile sile.

²¹ Ale lelo we Yawe uzye ntapata akupata, nu kupatisya yayo akakulwisya?

²² Ala mwine, nayapata wakwe cimwi, ala nayasoka wakwe cimwi, nkayalola sile wa anisi yane.

²³ Ncecete, we Leza, ulole umwenzo wane, unjezye pakuti umanye vino nkaelenganya.

²⁴ Lola ndi cakuti nimpita umu nzila iipe, ntungulule umu nzila ya umi wape.”