Masamu 137 - Amazwi Yakwe Leza 2013

Ulwimbo lwa kulaela umu uzya

¹ Uku nguzi zyaku Babiloni, twatangi nga twikala pansi twalilanga na minsonzi apa kwiusya Zioni.

² Kuku kwene akuno twakowekanga amazeze itu apa vimuti vyamu mbali ya luzi.

³ Pano yayo atulemile uzya yatulenganga kuti twimbile inyimbo. Yene yalondanga kuti twayasansamusya. Yatunenanga yati, “Twimbilini ulwimbo lwa ku Zioni.”

⁴ Uzye lyene tungimba uli lwimbo lwakwe Yawe umu mpanga ya inamasi wakwe ii?

⁵ Iye mwe! Ala ndi cakuti nilila wewe, we Yelusalemu, ikasa lyane ililunji kalyumile, ntakalizye izeze nupya.

⁶ Ululimi lwane nalo kalukakatile uku camvu, nga cakuti nata ukukwiusya, ale ntacitile Yelusalemu wane insansa zyonsi izyaluta pali vyonsi.

⁷ We Yawe, iusya vino aina Edomu yacisile uwanda uno Yelusalemu wazanzilwe. Iusya vino yakomilepo ukulanda ala yakuti, “Wongololini, muongolole suka na pansi.”

⁸ We mwana wakwe Babiloni, ala ulononwa! Walongo awiyo alalandula pali vino wacita

⁹ Walongo awiyo angatota utunya twako, nu kutufwantola ku ciliwe.