Masamu 136 - Amazwi Yakwe Leza 2013

Ulwimbo lwakutaizya Leza

¹ Taizini Yawe, pano wene umusuma, pano luse lwakwe ulwa pe na pee.

² Taizini Leza pali tuleza tonsi, pano luse lwakwe ulwa pe na pee.

³ Taizini Mwene Leza wakwe yamwene, pano luse lwakwe ulwa pe na pee.

⁴ Leza wenga mpo aliwe akacita ivyakuzunguka, pano luse lwakwe ulwa pe na pee.

⁵ Uku mano yakwe sile, wacisile amayulu, pano luse lwakwe ulwa pe na pee.

⁶ Wakuzile insi apapela ya matenga azike, pano luse lwakwe ulwa pe na pee.

⁷ Waumvile inkozyo izikulu, ilanzi nu mwezi, pano luse lwakwe ulwa pe na pee.

⁸ Ilanzi ilya kwangalila insita yakasanya, pano luse lwakwe ulwa pe na pee.

⁹ Umwezi nao ni ntanda ivyakwangalila usiku, pano luse lwakwe ulwa pe na pee.

¹⁰ Wakomile amayeli ya ina Eguputo, pano luse lwakwe ulwa pe na pee.

¹¹ Wafumizye aina Izlaeli umu Eguputo, pano luse lwakwe ulwa pe na pee,

¹² kwikasa lyakwe ilya maka ilitambalale, pano luse lwakwe ulwa pe na pee.

¹³ Walepwile Yemba Muyenzu, pano luse lwakwe ulwa pe na pee.

¹⁴ Walamvizye aina Izlaeli umukasi kakwe yemba, pano luse lwakwe ulwa pe na pee.

¹⁵ Wa unzizye Falao ni vita vyakwe muli Yemba Muyenzu, pano luse lwakwe ulwa pe na pee.

¹⁶ Watungulwile antu yakwe umu matololo, pano luse lwakwe ulwa pe na pee.

¹⁷ Wakomile yamwene ya maka, pano luse lwakwe ulwa pe na pee.

¹⁸ Wakomile yamwene alumbukisye, pano luse kwakwe ulwa pe na pee.

¹⁹ Wakomile Siooni, umwene wa ina Amoli, pano luse lwakwe ulwa pe na pee.

²⁰ Wakomile Ogi, umwene waku Basyani, pano luse lwakwe ulwa pe na pee.

²¹ Wapile impanga yao ku antu yakwe wa cuma ca upyanyi, pano luse lwakwe ulwa pe na pee.

²² Waipiile kuli Izlaeli umuomvi wakwe, pakuti iye iya caupyanyi cakwe, pano luse lwakwe ulwa pe na pee.

²³ Watwiwisye lino twazanzilwe, pano luse lwakwe ulwa pe na pee.

²⁴ Watupuswisye umu minwe ya anisi itu, pano luse lwakwe ulwa pe na pee.

²⁵ Wapile icakulya uku caumi icili consi, pano luse lwakwe ulwa pe na pee.

²⁶ Taizini Leza wa mwiyulu, pano luse lwakwe ulwa pe na pee.