Masamu 135 - Amazwi Yakwe Leza 2013

Ulwimbo lwa kulumbanya Yawe

¹ Lumbanyini Yawe! Lumbanyini izina lyakwe, mulumbanyini mwe aomvi yakwe.

² Mwe muno mukaimilila umu ng'anda yakwe Yawe, umu misolo ya ng'anda yakwe Leza witu.

³ Lumbanyini Yawe, pano wene umusuma. Imbilini inyimbo zyakulumbanya zina lyakwe, pano wene uwaluse.

⁴ Pano Yawe waisolwela Yakobo kuti aye uwakwakwe, wacita Izlaeli ukuya icuma cakwe.

⁵ Namanya ukuti Yawe umukulu, ukuti Mwene witu waluta tuleza tonsi.

⁶ Vyonsi vino Yawe akalonda ukucita ali vino akacita umwiyulu na muno nsi, muli yayemba nu mu matenga yonsi.

⁷ Akaleta amakumbi ukufuma uku mpela yonsi, alenga ni nkuwa ukupangalansya, nga aleta ni cimuza ukufuma umu nkoma zyakwe.

⁸ Wakomozile amayeli umu Eguputo, amayeli ya antu na anyama kwene.

⁹ Watumile ivimanyililo ni vizungusyo apakasi kako we Eguputo, pali Falao napa aomvi yakwe yonsi.

¹⁰ Wakomile imitundu iingi, nu kulovya yamwene ya maka,

¹¹ ali wakwe Siooni, umwene wa ina Amoli, na Ogi umwene waku Basyani, nga na yamwene yonsi aku Kenani.

¹² Wapiile impanga yao uku antu yakwe aina Izlaeli, kuti iye icaupyanyi cao.

¹³ Izina lyako, we Yawe ilya muyayaya. Inkulo zyonsi zilakwiusya.

¹⁴ Pano Yawe alataasya antu yakwe, alaya nu luse apa aomvi yakwe.

¹⁵ Tuleza tuluwi utwa mitundu yuze ya antu twapangilwa sile kuli siluva na zaabu, twapangwa uku makasa ya antu.

¹⁶ Twakwata nu tunwa, lelo tutange tuvwange. Twakwata na manso, lelo tutange tulole.

¹⁷ Twakwata amatwi, lelo tutange tuvwe, nanti ukufuuta tutange tufuute foo.

¹⁸ Antu yano yapanga tuluwi tuto yale yakolane nato, vivyo kwene avino ciye na kuli yayo akatutaila.

¹⁹ Mwe ina Izlaeli, lumbanyini Yawe! Mwe ang'anda yakwe Aloni, lumbanyini Yawe!

²⁰ Mwe ang'anga yakwe Levi, lumbanyini Yawe! Mwemuno mukamoopa, lumbanyini Yawe!

²¹ Lumbanyini Yawe umu Zioni, wiyo akaikala umu Yelusalemu!