Masamu 132 - Amazwi Yakwe Leza 2013

Ukulumbanya Ng'anda ikulu yakwe Leza

¹ We Yawe, uwaiusya Davidi nu kucululuka kwakwe konsi kuno wacululwike.

² Wene walavile nu mulapo kunuli we Yawe, walavile kuli Leza Wamaka yonsi wakwe Yakobo ati,

³ “Cumi, nsikwingila umu ng'anda yane, insikuya nkalale pa musanzi wane,

⁴ nsikutala indole utulo nanti ivipa vyane ukuzyata,

⁵ mpaka sile natala nalondela Yawe icifulo, incende umwakwikalamo Leza Wamaka yonsi wakwe Yakobo.

⁶ Uku Efulata tuvwile ulwa kululumba kwa Mbokosi ya Upangano.” Twaizanyile umu vyalo vyaku Yaali, ituvwanga tuti,

⁷ “Tuini katwapita uku cifulo uku kaikala Yawe. Tuini tukamupepe apa nkolelo ya cilimba cakwe, ica wene.

⁸ Katuka, we Yawe, wize umu ncende yako umwakupuzila, wewe pamwi ni mbokosi yako iya maka yako.

⁹ Yasimapepo yako kayazwale uololoke. Akaele nayo kayapunde nu luzango.

¹⁰ Apa mulandu wa ulayo wako ku muomvi wako Davidi, utatazyela umusololwe wako.”

¹¹ Awewe walavile nu mulapo kuli Davidi, ulayo uno utalafutuka uti, “Ndalasika wenga uwamu ana yako aonsi apa cilimba cako ica wene.

¹² Ndi cakuti ana yako aonsi yaca yamasunga upangano wane nu kuwaka amasunde yano nayasambilizya, ale lyene ana yako aonsi yalaya impyanyi zyako umuyayaya.”

¹³ Pano Yawe wasolola Zioni, ali wino watemwa kuti aye icifulo cakwe ca kwikalamo.

¹⁴ Wene wavwanga wati, “Paa, ali pano ndaikala nu kupuzila pee na pee. Ali pano ndikala pano ili ncende ino nasolola.

¹⁵ Ndapolelela wakwe cimwi umusumba wa Zioni apa kuupela vyonsi ivyulila mwenemo. Apina ya mwenemo nda iimula ni vyakulya ivivule.

¹⁶ Yasimapepo ya mwenemo ndayapolelela muli vyonsi vino yalacita, nga na ikazi ya mwenemo nayo yalimbila nu kupunda nu luzango.

¹⁷ Ali muno ndasolola wenga uwamu mupanda wakwe Davidi ukuya umwene. Ali mukwene muno ndatengelela ulayo wa mwene musololwe wane.

¹⁸ Anisi yakwe ndayafupilizya insonyi, lelo uwene wakwe wene ulaya nu longo wa kuwalula kwa maluwa.”