Masamu 129 - Amazwi Yakwe Leza 2013

Ipepo lyakufuntusya anisi ya ina Izlaeli

¹ We Izlaeli, tunene vino anisi yako yakakuzunya ukufuma sile ku wance wako. Vwanga uti,

² “Anisi yane yakanzunya wakwe cimwi, ukufuma ku wance wane, lelo yaposiwa ukuncimvya.

³ Yandepola ivilonda ivizike umwi tundu, ungati amuno alimi ya ng'ombe, yakwe pulao yalima.

⁴ Lelo Yawe akacita wa vyaololoke, wankulula uku uzya uku antu aipe.

⁵ Yayo yonsi yano yapata Zioni insonyi kaziyaleme nu kusunkilwa uku cisila.

⁶ Kayaye wi sote ilikamela apa mapaala ya ng'anda, nu kufoota ilifoota lino litacili lyalimba imisisi.

⁷ Kusiya nanti umuzombozi umwi uwakuti aliipe nanti ukulinyepa umu myanzi.

⁸ Nanti sile apita nzila, kutange kuloleke nanti wenga uwakuti ati, ‘Yawe akupolelele! Twamupolelela umwi zina lyakwe Yawe.’ ”