Masamu 119 - Amazwi Yakwe Leza 2013

Masunde yakwe Leza

¹ Alongo ayayo anzila zitambalale, yayo akalondela amasunde yakwe Yawe.

² Alongo ayayo akawaka amasunde yakwe nu kumulonda ni myenzo yao yonsi.

³ Yene yasicita cimwi iciipe. Yakapita umu nzila zyakwe.

⁴ We Yawe wakonkomizye ivyeo vyako ukuti vyasungwa ningo.

⁵ Si cange cizipe ukuti inzila zyane zilungamane umu kulondela ivyeo vyako.

⁶ Ndi caya vivyo intange indemwe ni nsonyi, lino nkulolekesya apa vyeo vyako vyonsi.

⁷ Lyene ningakuwanzya nu ku mwenzo mpee, apa kusambilila ivyeo vyako ivya ulungami.

⁸ Namayelanga amasunde yako, utakatale ukandekelezye.

Ukuyela amasunde yakwe Yawe

⁹ Uzye kwene umulumendo angaya uli uwakaele umu mipitile yakwe? Yangacita cico umukuyela amazwi yako.

¹⁰ Nkakuvula uku mwenzo wane onsi, utaleka napuzya umwi sunde lyako.

¹¹ Nkawaka amazwi yako umu mwenzo wane, apakuti intaluvyanya kunuli.

¹² Si leka yakulumbanye, we Yawe, unsambilizye ivyeo vyako!

¹³ Vyonsi sile vino akanwa kako kakapingula, visipuswa apa mulomo wane.

¹⁴ Nkasansamuka umu kulondela inzila zyako, ukuluta napa vyuma vyonsi.

¹⁵ Namaelenganyanga apa vyeo vyako, namasumbangako amanso yane apa nzila zyako.

¹⁶ Ivyeo vyako vikasansamusya, insiilila amazwi yako.

Uluzango ulwaya umu Masunde yakwe Yawe

¹⁷ Sungala ucitile umuzya wako ivisuma, nga nani namapita ulumi, imbwake na mazwi yako.

¹⁸ Njulile amanso uleke ndole ivinjelengwe ivyaya umu masunde yako.

¹⁹ Kwene nene mwenyi pano nsi, utamfisa ivyeo vyako.

²⁰ Umwenzo wane lyene ukukafila, pamulandu waciluka ca upinguzi wako.

²¹ Ukakalipila avilumba, yayo atipwe, yano yakapumbuka yasya amalamulo yako.

²² Funtusya panondi umuzewanya nu kusuulwa, pano nemo nkasunga amasunde yako.

²³ Nanti angala intunguluzi zingampangila, ne muomvi wako nkaelenganya sile apa vyeo.

²⁴ Vyeo vyako vikansansamusya, vili vino vikampanzya amano.

Ukulukisya ukuyela amasunde yakwe Yawe

²⁵ Umwenzo wane walematila uku lukungu. Kanzula umwenzo wane ndi muno wavwangile.

²⁶ Natala nalolola apa mipitile yane, nga nawe ungasuka. Unsambilizye ivyeo vyako.

²⁷ Ndondolwela ivyakulondela ivyeo vyako, uleke naelenganya apa vipezyamano vyako.

²⁸ Insilola utulo foo, apamulandu wa kunyomelwa na malanda. Unkomye ndi muno walaile.

²⁹ Umfuntusye ku nzila zya ntumpu, lelo uku usuma wako unsambilizye amasunde yako.

³⁰ Nasolola ukuya uwacuvwilo, nika nu mwenzo wane uku upinguzi wako.

³¹ Natinemelela uku masambilizyo yako, we Yawe. Utaleka indemwe ni nsonyi.

³² Ndasimwilila uku kuyela amalamulo yako, pano ulampeelela kweneko ukwiluka.

Ipepo lyakulenga ukwiluka

³³ We Yawe, unsambilizye upiliulo wa masunde yako, nupya ndayayela mpaka nu ku mpelelekezyo.

³⁴ Ndondolwela amasunde yako, nu kuyela namayayelanga nu kuyawaka nu mwenzo wane onsi.

³⁵ Umpeele ukuyela nu kuwaka amasunde yako, pano nemo ndazana uluzango.

³⁶ Umpeele umwenzo uwakulondesya ukuyela amasunde yako ukuluta ukuya umukama.

³⁷ Umfuntusye ku kwika amano uku vyaciwelewele, uye umusuma kunondi ndi muno walaila.

³⁸ Fikilizya ulayo wako kunondi ne muzya wako, ulayo kwene uno walaya kuli yao akakuyela.

³⁹ Mpususye uku kalandauzi kano nkaopa. Iye Mwene vino upinguzi wako wapezya mano!

⁴⁰ Nkulonda ukuyela amasunde yako, umpeele umi upya pano wewe mulungami.

Ukutaila Masunde yakwe Yawe

⁴¹ We Yawe undangizye vino wantemwa, umpususye ndi muno walaila.

⁴² Lyene ndaasuka yayo akandandaula, pano nataila umu mazwi yako.

⁴³ Undenge ukuti nalanda ivya cumi insita zyonsi, pano utailo wane waya umu upinguzi wako.

⁴⁴ Lyonsi indayela amasunde yako, umuyayaya

⁴⁵ Indikalilila lyonsi umuntungwa, pano nkaezya ukuyela amasunde yako.

⁴⁶ Indataka amasunde yako kuli yamwene, ni nsonyi ntaluvwa foo.

⁴⁷ Ninzana uluzango umu masunde yako, yano natintemwa wakwe cimwi.

⁴⁸ Nincindika nu kutemwa amasunde yako, nupya namakutumalangapo umu masunde yako.

Ukutaila mu masunde yakwe Yawe

⁴⁹ Iusya ulayo wako kunondi ne muzya wako, ulayo uno watiumpeela utailo.

⁵⁰ Nu mu ucuzi wane kwene natekeziwanga, pano ulayo wako wampile umi

⁵¹ Avilumba lyonsi yakulu kunsuula, lelo nemo ntafuntuka ukwi sunde lyako.

⁵² Nkwiusya amasunde yako ampiti, we Yawe, nupya yene yakantekezya.

⁵³ Lino nalola kuno antu aipe yakuvuna amasunde yako, awe cumi umwenzo wane iuwaya.

⁵⁴ Mukasi ka manda ya lwendo lwane pano nsi, natinsika inyimbo zya masunde yako.

⁵⁵ We Yawe, ala usiku nkakwiusya, nga namayelanga amasunde yako.

⁵⁶ Ala nkuuvwa uluzango umu kuyela amasunde yako.

Ukuipelesya umu kuyela amasunde yakwe Yawe

⁵⁷ We Yawe, wewe uli vyonsi kunondi, nalaya ukuyela amasunde yako.

⁵⁸ Nkukulenga uku mwenzo wane onsi, undole luse luse ndi muno walaila!

⁵⁹ Natinceceta inzila zyane, nupya nalaya ukulondela amasunde yako.

⁶⁰ Ukwaula nu kuzingota, nakalauka ukulondela amalamulo yako.

⁶¹ Antu aipe yatiyanteya inkose konsi konsi, lelo amasunde yako ntange nilile, awe.

⁶² Usiku pakasi nkakatuka ukukuwanzya apa upinguzi wako ulungame.

⁶³ Nene cuza wakwe yayo yonsi akakoopa, yayo yonsi akayela amasunde yako.

⁶⁴ We Yawe, ala insi yonsi yalimba ulukundo lwako ulwamuntaputuka, unsambilizye amasunde yako.

Ucindami wa masunde yakwe Yawe

⁶⁵ We Yawe, wawaka ulayo wako, nupya wewe musuma kunondi ne muzya wako.

⁶⁶ Umpeele ukumanya na mano, pano nemo nataila umu malamulo yako.

⁶⁷ Lino utacili umvunuke, napumbokanga umu nzila. Lelo ndakai nkayela izwi lyako.

⁶⁸ Iye mwe vino wazipa, vino waya nu luse! Nsambilizye amasunde yako.

⁶⁹ Nanti angala avilumba yakuntumpwila, lelo nemo nkayela amasunde yako nu mwenzo onsi.

⁷⁰ Antu amusango uo yasitezya, lelo nemo nkazangila mu masunde yako.

⁷¹ Canzipile ukuvunukwa, pakuti nsambilile amalamulo inu.

⁷² Amasunde yano wampile yaluta icuma icivule cakwe siluva na zaabu.

Ulungi wa Masunde yakwe Yawe

⁷³ Awewe wampanzile nu kumbumba na makasa yako. Umpeele ukwiluka, pakuti nsambilile amalamulo yako.

⁷⁴ Antu yano yakakoopa yakazanga nga yandola, pano nemo nkaapalila umu ulayo wako.

⁷⁵ We Yawe, namanya ukuti upinguzi wako uwa ulungi, nu kuti wamvunwike pano wewe wacumi.

⁷⁶ Leka uluse lwako ulwa muntaputuka lwa ntekezya, ndi muno wandavile ne muzya wako.

⁷⁷ Ndole luse luse nga nje nu umi, pano amalamulo yako yakanzanzya.

⁷⁸ Leka avilumba insonyi ziyaleme, apa lufyengo luno yakamfyenga. Kunondi ndetetwila umu masambilizyo yako.

⁷⁹ Leka yao akakoopa yize kunondi, yayo yonsi amanya amasunde yako.

⁸⁰ Leka nayela amasunde yako, nupya ntaya ni nsonyi zyakucimviwa.

Ipepo lya kukululwa

⁸¹ Umi wane wati uongoka apakulonda ukuluzi wako, lelo nemo nkapaalila umu ulayo wako.

⁸² Amanso yane yatiyatonta umu kulolela vino wandayanga. Lino nataka nati, “Uzye alilaci lino ulangazwa.”

⁸³ Nkoline sile wa nyambi yakwe waini itakweti umulimo, lelo nemo ntilila amasunde yako.

⁸⁴ Uzye namalolela ukufika lilaci? Uzye alilaci lino ulavunuka yao anzunya?

⁸⁵ Avilumba yao asiyela amasunde yako, yati yanjimbila amacinga.

⁸⁶ Amalamulo yako yonsi kwene akutailwa. Antu yaya yatiyanzunya umu kunsombezya, ntuule!

⁸⁷ Yali sile umupipi nu kundovya muno nsi, lelo kwene intatazyela amalamulo yako.

⁸⁸ Sunga umi wane pamulandu nu kutemwa kwako ukwa muntaputuka, kuti nane nayela amalamulo yako.

Utailo umu masunde yakwe Yawe

⁸⁹ We Yawe, izwi lyako lilayelelela pee, ilya muyayaya umwiyulu.

⁹⁰ Ukutailwa kwako kukatwalilila mpaka mu nkulo zyonsi. Watungilila insi, nga yene yasyalilila vivi kwene.

⁹¹ Ivintu vyonsi vicilipo ukufika na pilelo, apamulandu wi lamulo lyako. Pano vyonsi vikakutumikila.

⁹² Iciya cakuti amasunde yako yasi akunzanzya, ngano nafwa mpiti uku macuzi yane.

⁹³ Ntalatala nilile amasambilizyo yako, pano ali muno wansungila kuti inje umumi.

⁹⁴ Nene wakwako, ungala untuule! Nezya ukulondela amasunde yako.

⁹⁵ Antu aipe yakulolela kuti yankome, lelo ndakutumalilapo umu masunde yako.

⁹⁶ Natinsambilila ukuti ivintu vyonsi vili ni mpelelekezyo, lelo amasunde yako yene yaya afumaluke.

Ukutemwa Masunde yakwe Yawe

⁹⁷ Iye mwe, silola vino natemwa amasunde yako wakwe cimwi! Nkayelenganya uwanda onsi.

⁹⁸ Isunde lyako lyaya nane insita yonsi nupya likaleka injeleko na mano ukuluta anisi yane.

⁹⁹ Natinja na mano ukuluta na yakasambilizya yane yonsi, pano nkakutumalilapo apa malamulo yako.

¹⁰⁰ Nanti nkwatilapo amano ukuluta aikolo yampiti, pano nkauvwila amasunde yako.

¹⁰¹ Natindeuka uku kucita iviipe vyonsi, kuti njele amazwi yako.

¹⁰² Nemo ntatazyela masambilizyo yako, pano wewe kwene uli kasambilizya wane.

¹⁰³ Iye mwe vino amasambilizyo yako yalyompa, yene yalyompa ukuluta uci mu mulomo wane!

¹⁰⁴ Inkalonka amano ukufuma uku masunde yako, ali cino fwandi napata ni misango iipe yonsi.

Uluswepo ukufuma uku Masunde yakwe Yawe

¹⁰⁵ Amazwi yako ali lampi ilya kuntungulula, nupya ali luswepo lwa kunkozezya inzila yane.

¹⁰⁶ Indi nu kusunga ulayo wane, uwakuyela amasambilizyo yako a ulungi.

¹⁰⁷ Natincula wakwe cimwi, We Yawe uwake umi wane, ukulingana ndi muno walaila.

¹⁰⁸ We Yawe, pokelela ipepo lyane ilyakukutaizya, nupya unsambilizye amalamulo yako.

¹⁰⁹ Umi wane uli mu minwe yako amanda onsi, Acino ntange ntale nilile amasunde yako.

¹¹⁰ Antu aipe yala yanteya, lelo ntalatala mfutatile amasunde yako.

¹¹¹ Amalamulo yako ali vyuma vyane ivyakuyelelela. Ali luzango lwa mwenzo wane.

¹¹² Umwenzo wane ukulukisya ukuyela amasunde yako mpaka uwanda uno ndafwa.

Kucingililwa mu masunde yakwe Yawe

¹¹³ Napata yayo andimi ziili kunuli, lelo natemwa amasunde inu.

¹¹⁴ Wewe uli ncende yane yakuzinamo ni cisyangu cane, nupya nemo nkapaalila umu ulayo wako.

¹¹⁵ Senkini panondi, mwe antu akacita iviipe, kuti nemo nayela amasunde yakwe Leza wane.

¹¹⁶ Mpeko amaka ndi muno walaile, nani namaya nu umi. Utaleka ntovoke umu upaalilo wane.

¹¹⁷ Ndemelele, nga nani namakululwa, nupya ndacindika amasunde yako amanda pe.

¹¹⁸ Ukakana wiyo wensi uwasula amasunde yako, pano intumpu zyao izya ciwelewele.

¹¹⁹ Antu yonsi aipe ya pano nsi, ukayacita kwati ivikona, caleka nemo natemelwa usambilizyo wako.

¹²⁰ Umwili wane ukuzakaza pamulandu wa koopa wewe, nemo indi ni ntete zya upinguzi wako.

Icuvwilo uku Masunde yakwe Yawe

¹²¹ Natincita vyaololoke ni vilungame. Utantazyela nje mu makasa yakwe yayo anzunya.

¹²² Undaye ukuti ulangazwa ne muzya wako. Utaleka ukuti avilumba yanzunye!

¹²³ Amanso yane yatiyatonta muno yakulolela ufyusi wako, ukuluzi uno walavile.

¹²⁴ Ucitile umuzya wako, ukulingana nu kutemwa kwako, nupya unsambilizye amalamulo yako.

¹²⁵ Nene muomvi wako, ungala umpeele ukwiluka, apakuti inde imanye amasambilizyo yako.

¹²⁶ We Yawe, insita yatifika yakuti ucitepo cimwi, pamulandu wakuti antu yasikuyela amasunde yako.

¹²⁷ Ala natemwa amalamulo yako ukuluta Zaabu, ukuluta Zaabu wiya kwene umusuma cuze.

¹²⁸ Acino pamulandu wakuti nkalondela amasambilizyo yako yonsi, nemo napata imisango iipe yonsi.

Kulondesya ukuyela Masunde yakwe Yawe

¹²⁹ Amasambilizyo yako yene akuzunguka. Caleka nemo nkayayela nu mwenzo wane onsi.

¹³⁰ Ulondolozi wa mazwi yako uli wa luswepo, wene ukaletela imbutuma amano.

¹³¹ Umukulukisya amalamulo yako, nemo naasama akanwa nu kwasela.

¹³² Futatukila kunondi, nu kundola luse luse, ndi vino ukacita kuli yonsi yao akutemwa.

¹³³ Ndi muno wandaile, ndemelele, utaleka impone. Utaleka inkota zincimvye.

¹³⁴ Unkulule ku antu anzunya, apakuti ningayela amalamulo yako.

¹³⁵ Umpolelele apakuya nani ne muomvi wako, nupya unsambilizye amasunde yako.

¹³⁶ Aminsonzi yakufomfomoka sile umu manso yane, apamulandu wakuti antu yasiyela amasunde yako.

Ulungi wa Masunde yakwe Yawe

¹³⁷ Wewe kacita wa vyaololoke, we Yawe, na masunde yako acumi.

¹³⁸ Amasambilizyo yako yano ukupeela, alungame nupya akutailwa.

¹³⁹ Umuzonda wane ukupya wa moto umu mwenzo wane, pano anisi yane yatiyilila amazwi yako.

¹⁴⁰ Amalayo yako acumi, silola vino ne muomvi wako nayatemwa.

¹⁴¹ Nanti angala nacepa sana nu kusuulwa, lelo nsitala nilila amasambilizyo yako.

¹⁴² Wololoke wako ulayelelela pee, na masunde yako yalaya acumi pee.

¹⁴³ Ucuzi nukunyongoloka vyati vindema ivintitikizya, lelo amasunde yako yakundetela uluzango

¹⁴⁴ Amasambilizyo yako alungame umuyayaya, umpeele ukwiluka kuti nje umumi.

Ipepo lyaku kululwa

¹⁴⁵ Nkulila kunuli nu mwenzo wane onsi, ungasuke, we Yawe. Nani namayela amalamulo yako.

¹⁴⁶ Nalaizya kunuli, ule untuule, nga nani namawakanga amasunde yako.

¹⁴⁷ Lino ilanzi litali litunke, nkalaizya kunuli ala nkulonda uwazwilizyo. Nemo nkapaalila umu ulayo wako.

¹⁴⁸ Usiku onsi insilola utulo, kuti inkutumale apa malayo yako.

¹⁴⁹ Kutika ukwi zwi lyane pamulandu wa kutemwa kwako ukwamuntaputuka. We Yawe, uwake umi wane, pamulandu wa mizu yako.

¹⁵⁰ Antu akanzunya yakumpalamila. Yene yasiezya nanti panono ukuwaka amasunde yako.

¹⁵¹ Lelo we Yawe uli umupipi nani, nga na malamulo yako acumi.

¹⁵² Kufuma uku mpiti nasambilila kunuli amasambilizyo yako ukuti awewe wayapanzile kuti yikalilile pe na pee.

Ipepo lya wazwilizyo

¹⁵³ Lolekesya apa kucula kwane, nga untuule pano nemo ntiilila amasunde yako.

¹⁵⁴ Umvwangile umulandu wane nu kunkulula, Untuule ukulingana nu ulayo wako.

¹⁵⁵ Ufyusi uli ukutali na antu aipe, pano yene yasiyela amasunde yako.

¹⁵⁶ Lelo uluse lwako ulukulu, we Yawe, undange uluse lwako nu kumpususya.

¹⁵⁷ Nakwata anisi yane nyanya yayo akanzunya, lelo ntapumbuka uku kuyela amasunde yako.

¹⁵⁸ Nkati ndi nalolekesya antu asitaila, pamulandu wakuti yasiwaka amalamulo yako, nemo inyunguluka.

¹⁵⁹ Silola vino natemwa usambilizyo wako, We Yawe, uwake umi wane ukulingana nu kutemwa kwako.

¹⁶⁰ Amazwi yako yonsi acumi, nu upinguzi wako onsi uwa ulungi pe na pee!

Ukuipelesya uku Masunde yakwe Yawe

¹⁶¹ Intunguluzi zya maka zikanzunya apaula umulandu, lelo umwenzo wane ukacindika amasunde yako.

¹⁶² Nemo indi nu luzango apamulandu na malayo yako. Nene muzange wa muntu umwi uwazana icuma icivule.

¹⁶³ Napata nu kusoka intumpu, lelo natemwa amasunde yako.

¹⁶⁴ Amaila cinimbali cila wanda, inkakutaizya apa upinguzi wako uwa ulungi.

¹⁶⁵ Antu yano yatemwa amasunde yako yakwata umutende ufumaluke, nupya kutaya nanti cimwi icingayaponya.

¹⁶⁶ Inkulolela wewe we Yawe, kuti umpususye, nupya nkayela amalamulo yako.

¹⁶⁷ Nkayela amasambilizyo yako, pano nayatemwa wakwe cimwi.

¹⁶⁸ Nkayela amalamulo yako na masambilizyo yako, pano wemo ukalola vyonsi vino nkacita!

Ipepo lyakulenga uwazwilizyo

¹⁶⁹ Leka ukulila kwane kuvwike kunuli, we Yawe. Umpeele ukwiluka ukulingana nu ulayo wako.

¹⁷⁰ Uvwa, kutika ukwi pepo lyane, nupya umpususye ndi muno walavile!

¹⁷¹ Pa kanwa kane pafume amalumbo, pano ukansambilizya amasunde yako.

¹⁷² Namaimbila inyimbo zya masunde yako, pano amalamulo yako alungame.

¹⁷³ Si walukuiteanya ukungazwa lyonsi, pano nkalondela amalamulo yako.

¹⁷⁴ Silola vino nkulukisya ufyusi wako, we Yawe! Nkazana uluzango umu masunde yako.

¹⁷⁵ Umpeele umi apakuti ningakulumbanya, na masambilizyo yako yale yaye uwazwilizyo kunondi.

¹⁷⁶ Inkululumba wa mfwele iponge, lelo ndanga undondole ne muzya wako, pano nemo ntapumbuka umu masunde yako.