Masamu 116 - Amazwi Yakwe Leza 2013

Umwi uwakululwa ku mfwa, walumbanya Yawe

¹ Nemo natemwa Yawe pano akanguvwa, akatezya nu kupapata kwane.

² Akantezya lyonsi lino nalaizya kunoli.

³ Uzanzo wa mfwa wanzingulwike. Isakamiko lya mfwa wamvimbilikizye, icakuti nemo pasi pantete nu kusakamala sana.

⁴ Alino lyene nalaizye kuli Yawe inti, “We Yawe, napapata ndu ntuule!”

⁵ Yawe waya ni nkumbu nupya umusuma, ala Leza witu waya nu luse wakwe cimwi.

⁶ Yawe akapokolola kweneko yayo apelelwa, aliwe wampuswisye lino nali umu ntazi.

⁷ Awe cumi lyene nisya umwenzo, pano umwene wancitile ivizipe.

⁸ Yawe watampususya uku milomo yi lindi. Watankumbula aminsozi, watakana nu kuti nemo, incimbe.

⁹ Fwandi nemo lyene namapitanga apa cinso cakwe Yawe, umu nsi yakwe yayo aumi.

¹⁰ Nemo nazuumile Leza nanti angala natazile indanda inti, “Awe lyene nemo lwala lwasila.”

¹¹ Walanga amano yatala yampela, navwanzile inti, “Awe cumi antu yonsi aufi.”

¹² Ivyani fwandi vino ningalipa kuli Yawe apa visuma vyonsi vino wancitila?

¹³ Nemo namatuula sile kuli Yawe uwila wakwe waini pakumutaizya apakumpususya.

¹⁴ Umwi uvi lya antu yakwe, muno yatiyakongona, ali muno namafikilizya ulayo kuli Yawe uno namulavile.

¹⁵ Ala Yawe cikamuwaya sana umuntu wakwe umwi nga wafwa.

¹⁶ Yawe, ala nene muzya wako, nemo nkakuombela vivi kwene vino mayo nawe wacitanga. Wemo watunsapula umunyololo, watunkulula.

¹⁷ Namakutuula impolelwa yaku kutaizya nu kutuula ipepo lyane kunuli.

¹⁸ Namafikilizya ulayo uno nalavile we Yawe, apa manso yi uvi lyako ilyati likolongana,

¹⁹ umu musolo wa Ng'anda yako ikulu yamu Yelusalemu.