Masamu 115 - Amazwi Yakwe Leza 2013

Leza wacumi uwaya wenga mpo.

¹ Awewe sile wenga, we Yawe, ala awewe wenga sile. Wewe sile ulinzile ukucindikwa, asi sweswe foo. Wewe sile ulinzile ukucindikwa apa luse lwako ulwa pee na paufuma cumi wako.

² Icani fwandi cino ainamasi yangauzizya iyati, “Uzye Leza wao waya kwi?”

³ Ala swemo Leza witu waya umwiyulu, akacita na vyonsi vino atemilwe.

⁴ Yene tuleza twao utuluwi twakwe siluva nu twakwe zaabu, tuto utwapangwa ni minwe ya antu.

⁵ Utulomo twene twakwata, lelo tusivwanga foo. Amanso nayo kwene twakwata, lelo tusilola foo.

⁶ Amatwi nayo kwene twakwata, lelo tusiuvwa foo. Ni mpuno twakwata, lelo tusinunsya foo.

⁷ Iminwe nayo twakwata, lelo tutange tuleme cimwi foo. Amaulu nayo twakwata, lelo tutange tupite foo, nanti sile icilulumo ciizwi lyatuko, cisiuvwika foo.

⁸ Antu yano yatupanga, nu kutuceceta nayo kwene yalingana mano nato!

⁹ Ala mwe ina Izlaeli, si mwataila sile Umwene! Pano aliwe sile akamwazwa nu kumuvwangila.

¹⁰ Mwe amu luko lwakwe Aloni, mwataila sile Yawe! Pano aliwe sile akamwazwa nu kumuvwangila.

¹¹ Mwe, mwemuno mwakwatila Yawe icoopo, mwamutaila. Pano aliwe akamwazwa nu kumuvwangila.

¹² Swemo Yawe akatwiusya pee, nupya amatupolelelanga. Amapolelelanga na ina Izlaeli kumwi na amu luko lwakwe Aloni.

¹³ Yawe amapolelelanga yayo yonsi akamoopa akama kumwi na apina.

¹⁴ Yawe angala amupeelesya ikwata, mwemwe kwene kumwi na ana kuvyalwa inu.

¹⁵ Yawe sangala amupolelele, wiyo uwaumvile iyulu ni nsi!

¹⁶ Yawe sile wenga aliwe ali mweneco wi yulu, insi yene aino wapeela antu.

¹⁷ Afwe yatange yalumbanye Yawe foo. Yalala yaya uku mpanga uku myalale cele.

¹⁸ Lelo swemo swe apuma, sweswe katwalumbanya Yawe ukutandika ilelo kwene mpaka na manda pe. Lumbanyini Yawe!