Masamu 113 - Amazwi Yakwe Leza 2013

Ukulumbanya usuma wakwe Yawe

¹ Lumbanyini Yawe! Lumbanyini Yawe mwe yaomvi yakwe, lumbanyini izina lyakwe Yawe!

² Yawe kacindikwe ukutandika ilelo, ukufika na manda onsi.

³ Ukutandikila sile pano katunkila ukufika na pano kamawila Yawe kacindikwe.

⁴ Yawe aliwe wateeka antu ya mitundu yonsi iya pano nsi, nu ucindami wakwe waluta na piyulu kwene!

⁵ Uzye aweni angalingana na Yawe Leza witu, wiyo uwikala apatumpuke apapela,

⁶ wino akalolekesya na pano nsi, apayela ulwelele ni nsi?

⁷ Aliwe akakatusya umulanda apa citumba nu kutumpula umucuzi umu vikona,

⁸ apakuti yaikala pamwi ni ntunguluzi zya antu yakwe.

⁹ Aliwe sile awino akacindamika ing'umba apa ng'anda nu kuisansamusya apa kuipeela umwana. Lumbanyini fwandi Yawe!