Masamu 112 - Amazwi Yakwe Leza 2013

Isyuko lya muntu musuma

¹ Lumbanyini Yawe! Wasyuka wiyo akacindika Yawe, wiyo uwatemwisya amasunde yakwe.

² Ana ya muntu wiyo yalaya na maka muno nsi, nu luko lwakwe lulaya ulupolelelwe.

³ Ucindami nu kama wa vyuma, vilaya umu ng'anda yakwe, nga nu lulumbi lwakwe lulayelelela pee!

⁴ Uluswepo lukakozezya umufite uku antu asuma, kuli yao a luse, ankumbu nupya alungami.

⁵ Wasyuka umuntu wiyo uwaya nu mwenzo wa kukopesya auze, wiyo atakwata ucenjezi muli vyonsi vino akacita.

⁶ Umuntu musuma wene kusi icilamuponya pansi, nupya atalatala aililikwe foo.

⁷ Asioopa nanti panono ndi cakuti yamwikwila isyamo. Wene waya umuposye apamulandu sile uwakutaila muli Yawe.

⁸ Wene asisakamikwa nanti ukuvwa intete, akasininkizya ukuti alalola kuno anisi yakwe yakucimba.

⁹ Waya ni nkumbu uku alanda, nga nu luse lwakwe nalo ulwa muyayaya. Alakwatisya amaka nu kucindikwa alacindikwa.

¹⁰ Antu aipe nga yalola vivyo, yene pasi pakusoka, iyataka nu kulumanya incecete, nu kusalangana ala yasalangana. Icacumi ivikataila aipe vilasililikila