Masamu 109 - Amazwi Yakwe Leza 2013

Ukuilizyanya kwa muntu wino ali umu ntazi

¹ Utamyalala sile, we Leza, wemuno nkulumbanya!

² Pano antu aipe na aufi yatiyankatukila nu kuntumpwila.

³ Yakuvwanga ivyaufi pali nene, yakunsonsomba ukwaula umulandu

⁴ Yatiyankatukila nanti angala nemo nayatemwa, nukuyapepela nemo nkayapepela kweneko.

⁵ Akula nemo nayacitila ivisuma, yene iyambwezezya uyi, ndi nayatemwa, yene iyambwezezya ulupato.

⁶ Sungala uleke umuntu umwi umwipisye awino apingwile umwanisi wane, leka nu mwanisi wakwe awino amusinile.

⁷ Leka ukuti yamupingule, yamuzane nu mulandu. Ipepo lyakwe kaliye ilya nkota!

⁸ Amanda yakwe kayapunguke, nu muntu muze atoole amalo yakwe!

⁹ Ana yakwe kayaye ana asyale, nu muci kaye a mukamfwilwa.

¹⁰ Lekini ana yakwe yazeuluka, yalenga lenga sile yasuke yayazinge nu mu matongwa yao!

¹¹ Wensi uwamukongwisye impiya kamupokolole ivyuma vyakwe vyonsi. Umwenyi kamupokolole vino walonsile nu kuviculila.

¹² Kutezya kuye nanti wenga uwakumuvwila uluse, pataya nanti umwi anguvwila ana yakwe asyale uluse.

¹³ Uluko lwakwe kalulowelele, ni zina lyakwe lisilile umu nkulo yonga sile.

¹⁴ Sangala Yawe aiusya uyi wakwe isi, nu uyi wakwe nyina utakatale uwelele.

¹⁵ Sangala Yawe alukwiusya amaifyo yao, lelo yene yililikwe!

¹⁶ Pano wene atatazile aelenganya apakukwata uluse. Wacuzyanga pee umupina nu mupuzi, nga nu mucululuke suka sile ayakoma iyafwa.

¹⁷ Watemilwe ukutipwila fwandi katipwe! Atalondanga ulongo, fwandi ulongo kalumutaluke!

¹⁸ Wazwalanga intipu kwati ilaya, fwandi kazimutipasye wa manzi, zimutepwensule nu mumafupa wa mafuta.

¹⁹ Kavile viye wa nsalu ino akavimbala, wa musipi uno ukamfyenta umu musana.

²⁰ Ali vino Yawe angaletela uyi kuli yayo ampata, aakavwanga iviipe pali nene!

²¹ We Yawe Simwandalali ungantuula ndi muno wandaile, umpususye pamulandu ni citemwiko cako ica luse.

²² Nene mulanda nupya umupuzi. Umwenzo wane umukasi watiuciswa.

²³ Nkuzimilila wa cinzingwa ca manguzi. Nkuuluka wa cikwe.

²⁴ Amakokola yane atolompoke pamulandu wa nzala. Mwili wane uonde usi na mafuta.

²⁵ Antu nga yandola, pasi pakunsoweka. Lino yandola yakupunga sile imitwe yao.

²⁶ Ungazwe, we Yawe Leza wane. Umpususye ukulingana nu kutemwa kwako ukwa pee.

²⁷ Leka anisi yane yamanye ukuti awewe sile ukampususya.

²⁸ Nanti yangantimpwila wemo ukampolelela, lino yankatukila, leka insonyi ziyaleme! Umuomvi wako kalu kuzanga!

²⁹ Leka anisi yane yazwale umuzewanya. Nupya insonyi ziyavimbilikizye wa nsalu.

³⁰ Nemo namataizyanga wakwe cimwi nu kukumilila utupundu. Icacumi namakulumbanyizizyanga umukasi ki uvi.

³¹ Yawe akavwangila umupina, nu kumupususya kuli yao akamupingwila ukufwa.