Masamu 108 - Amazwi Yakwe Leza 2013

Ipepo lyakulenga uwazwilizyo umu nkondo

¹ We Leza, nemo umwenzo wane watiuiteyanya. Nemo namakwimbilanga inyimbo izya kukulumbanya! Kulukunta we mwenzo wane.

² Kanzika we ngoma yane ni cinanda cane! Namakatuka pa macaca!

³ Namakutaizyanga uku mitundu ya antu, we Yawe! Namakulumbanyanga uku inamasi yonsi.

⁴ Ukutemwa kwako ukusisila kwafika nu mwiyulu, icumi cako cafika nu mu makumbi.

⁵ We Leza, ilange kuko kuno waya ukwiyulu. Leka nu ucindami wako uloleke pano nsi ponsi!

⁶ Tutaasye fwandi uku maka yako, uuvwe ipepo litu, apakuti antu yako yano watemwisya, yakululwe.

⁷ Umwi sano lyako ilyamuzilo, ali muno we Leza wavwanzile uti, “Apa nsita ya ucimvyo wane indankanya Syekemu nu kupima Cifoloma ca Sukoti.

⁸ Gileadi wene uwakwane, na Manase kwene, nawe kwene uwakwane. Efulemu nawe ali cimpompo cane. Yuda nawe ali nsonzo yane iya wene.

⁹ Moabu wene alaya wa musambilo wane. Edomu nawe alaya wa lusapato lwane, wa cimanyililo cakuti uwakwane. Lyene aina Filisti yangatumba inkansi uli, nu kuyuvwa kunondi apa mpanga zino nacimvya?”

¹⁰ Uzye aweni alantwala umu musumba wi linga? Alantwala uku Edomu, aweni?

¹¹ Uzye kwene umwelimo Leza watatutazyela? Uzye kwene usikwiza uye naswe ni vita vitu?

¹² Sungala sile utwazwilizye ukulwisya anisi itu, pano amaka ya antu asile sile!

¹³ We Leza, ndi cakuti waya ukulusansa lwitu tumacimvya. Awewe umalovya nu kulyatilila anisi itu.