Masamu 107 - Amazwi Yakwe Leza 2013

LUPAPULO LWAKWE CISANO (Masanu 107–150) Usuma wakwe Leza ku antu yakwe

¹ Taizini Yawe, pano wene umusuma. Ukutemwa kwakwe ukwa manda pe.

² Yano Yawe wakulula, ali vino kayavwanga, yayo yano wakulwile umu makasa ya anisi yao.

³ Yano wakolonginye ukufuma mu mpanga zyonsi. Izyaku ufumondaka ni zyaku uwondaka. Izyaku kayeya nga ni zyaku katutu.

⁴ Yapulupuntanga umu lwanga, nu mu mapoli. Yatazanyile umusumba umwakwikala.

⁵ Yacululukanga uku nzala nu lusala. Imipasi yao pasi pakuongoka nu kutovoka!

⁶ Umu ulanda wao iyalilila Yawe, nawe ayatuula umu ntazi zyao.

⁷ Ali pakuyatungulula umu nzila ilungame, iyakuyatwala uku muzi wa antu.

⁸ Kayale yalumbanya Yawe apa kutemwa kwakwe ukwa pe, nga na pavizungusyo vino akacitila ana ya antu.

⁹ Akaikusya umwenzo uli nu lusala, nu kupeela ivisuma kuli yano yali ni nzala.

¹⁰ Yamwi yikalanga umu mfinzi umu kanda nu mu cinzingwa ca mfwa, ala yatiyanyepwa umu minyololo,

¹¹ apamulandu wakutalamila amasunde yakwe Leza, nu kusuula amano yano umusambazi wayapanzile.

¹² Caleka watonsizye imyenzo yao uku milimo ikome, yaponanga pansi, nga kutali nu wakuyazwa.

¹³ Nga alino yalaizye kuli Yawe umu ulanda wao.

¹⁴ Nga nawe wayakulwile uku ucuzi wao. Wayafumizye umu mfinzi nu mu cinzingwa ca mfwa. Nupya waputwile ni minyololo yao.

¹⁵ Kayale yalukulumbanya Yawe, apa kutemwa kwakwe ukwa pe na pa milimo yakwe iyakuzunguka ino wacitila ana ya antu!

¹⁶ Aliwe akalepola ivisasa vya mukuwa nu kuputola imikolongelo ya vyela.

¹⁷ Yamwi yene yavulungine pamulandu wa mpulumpulu zyao. Yacululwike wakwe cimwi pamulandu wa uyi wao sile.

¹⁸ Yaposiwanga ukulya ivyakulya, iviyafisya uku myenzo, cikanga sile yafwe nu kufwa.

¹⁹ Nga alino umu ulanda wao iyalilila Yawe nga nawe ayapususya umu ntazi zyao.

²⁰ Wene apeela ilamulo lyakwe, nu kuyapozya ayapozya, ayafumya nu mu cinzingwa ca mfwa.

²¹ Fwandi yafwile yawanzya Yawe apa kutemwa kwakwe, ukwa pe nga napa vintu vino wacitila ana ya antu.

²² Kayamocela impolelwa yaku muwanzya nu kumwimbila ni nsansa apa kutaka vyonsi vino wacita!

²³ Yamwi yapitanga pali yemba ni vimato, lino yaombanga umulimo wa uculuzi.

²⁴ Yailolile yonga vino Yawe wacita, ni vinjelengwe vyonsi ivya kuzunguka ivyaya umu maziya.

²⁵ Nga wapeela ilamulo, umuza iukatuka, iukatusya na maimbi pali yemba.

²⁶ Ivimawato vyatumpulwanga umupela nu kuitamola api ziya, icakuti imyenzo ifuma, icipezya na antu amano.

²⁷ Antu iyatalatanta nu kuzakaza, ungati akolesi, ni vyakucita iviyaula.

²⁸ Nga alino umu ulanda wao iyalilila kuli Yawe, nawe ayapususya umu ntazi zyao.

²⁹ Amyalalika icimuza, na maimbi iyalala na zii!

³⁰ Iyazanga pano icimuza calala, na maimbi nayo yalala, nawe ayafumizya ukunzi, uku citutu kuno yalondanga.

³¹ Silekini lyene yataizye Yawe apa kutemwa kwakwe ukwa pe.

³² Fwandi yafwile yalazya ululumbi lwakwe Yawe ukwi uvi mu kumulumbilizya ukwi tengo lya makombe.

³³ Aliwe akakamya inguzi izyuma solokoto. Akamya nu tufukoka twa manzi kwene.

³⁴ Impanga ya vilyo isangula iya cicelecele, apamulandu nu uyi wa antu atenzi mwenemo.

³⁵ Asangula ulwanga, iluya ivilambe vya manzi. Impanga iyumalale iya intulo ya manzi.

³⁶ Amuno wapeela antu ya nzala kuti yikale mwenemo nga nayo iyakuula nu musumba uwakwikala mwenemo.

³⁷ Mpaka iyasuka iyakomela ni mbezu umu vyalo vyao iyalema na matingi nu kusyukila uzombozi usuma.

³⁸ Ayapolelela iyavyala na ana avule, nu kuteeka amaufyo ya viteekwa aula ukucepelako.

³⁹ Lino antu yakwe Leza yacepilwe amaka, pamulandu na kanyati ka kutekwa uku kalili,

⁴⁰ alino walesile ukuti asambazi yasuulwe, aleka nu kuti yalulumbe umu lwanga umwaula inzila.

⁴¹ Alanda yene ayafumya umu ulanda wao, asandulula ni nko zyao kwati amaufyo ya viteekwa.

⁴² Aololoke imyenzo yaweni cico, iyazanga, nu uyi onsi iyauputula umunyanya.

⁴³ Uwa mano lekini asambilile cico, nu kwiluka kailuke apa kutemwa kwakwe Yawe ukwa muntaputuka.