Masamu 106 - Amazwi Yakwe Leza 2013

Usuma wakwe Yawe uku antu yakwe

¹ Lumbanyini Yawe. Taizini Yawe, pano wene umusuma. Ukutemwa kwakwe ukwa manda pe.

² Aweni angatantawila ivicitwa vyakwe Yawe ivyakuzunguka, nu kusimika amalumbo yakwe yonsi?

³ Yasyuka akasunga vino akapingula, akacita pe ivilungame!

⁴ We Yawe, uwanjiusya lilyo lino ukwazwilizya antu yako, uwa mpempula lino ukupususya yamwi.

⁵ Ungaleka indole isyuko lya asololwe yako nu kukumako uku nsansa zya mutundu wako, nu kuitanka pamwi na akwako.

⁶ Twaifizye kumwi ni vikolwe vitu, twaluvyanyizye nu kupulupunta twaifya kunuli.

⁷ Ivikolwe vitu umu Eguputo vitatezizye ivipezyamano vyako, vitiwisye nu luse lwako uluvule, vyatalamila umucindami kuli Yemba Muyenzu.

⁸ Lelo wene wayapuswisye pamulandu wa ulayo wakwe apakuti alanga amaka yakwe alulumbi.

⁹ Wapile ilamulo kuli Yemba Muyenzu nu kupwa wapwa, iyalamba na pansi apa musili uume ndi.

¹⁰ Wayapuswisye umu makasa yakwe yayo ayazunyizye, wayatuula umu makasa ya mwanisi.

¹¹ Anisi yaunzilwe umu manzi, kutapuswike nanti wenga.

¹² Alino lyene yazumila amazwi yakwe, yamaimba na malumbo yakwe.

¹³ Yakalauka ukwilila uku vicitwa vyakwe, kusi kulolela ukuti ayapanzyeko amano.

¹⁴ Ulwinswa lwayalema umu lwanga, nu kwezya Leza

¹⁵ Wayapeela vino yakulonda, ali pakuyatumila ulwale wacipezya mano.

¹⁶ Lyene umu nsakwe ali pakukwatila Mose na Aaloni uzuwa, umucindami wakwe Leza.

¹⁷ Nga alino papo kwene umusili wayulika, wamila Datani nu kukupikila Abilamu na amu ng'anda yakwe.

¹⁸ Umoto wiza apakasi kao, icimbilimbili coca na antu aipe

¹⁹ Yapanga icing'ombe cakwengulula na zaabu uku Holebu, nu kucipepa yacipepa.

²⁰ Yezya uwamuzilo umucindami yalondelela icinkolanya iciluwi ca ng'ombe yonsi, ikalya umulemvwe.

²¹ Yilila kuli Leza uwayakulwile, uwacisile ivintu ivikulu mu Eguputo,

²² ivizungusyo vino wacisile mumu mu mpanga yakwe Hamu! Iye mwe ivintu nu kupelenganya, vino wacisile kuli Yemba Muyenzu!

²³ Ali cino Leza walanzile ukuti wange ayonone, iciya cakuti Mose umusololwe wakwe atimilila inkolelo yakwe, nu kuyapapatila apakuti angawezya umwenzo, atayonona.

²⁴ Yasuula impanga ya nsansa, pakukana zumila amazwi yakwe Leza.

²⁵ Yakuinong'onya umu nsakwe zyao, yakana nu kuvwa izwi lyakwe Yawe.

²⁶ Nga alino watumpula ikasa lyakwe apakulapa ati, “Ndamukomola umu lwanga,

²⁷ ndakomola na ana inu mukasi ka mitundu, ndayasansantila umu masi.

²⁸ Yalaaitwika sile iyoko lyakwe Baali waku Peoli awino yakapepa nu kulya impolelwa yakocela afwe.

²⁹ Yavundula sile icipyu cakwe Leza, umu vicitwa vyao wayaponyezya impungo.

³⁰ Pineasi ali pakukatuka, wamala umulandu, ni mpungo yasila.

³¹ Pamulandu wakwe cico, ali cino akaamilwapo umulungame pee ku nkulo zyonsi.

³² Nupya kwene yalenga Leza ukusoka, uku Meliba nu uyi wao waletelela na Mose kwene,

³³ pamulandu wakuti yamusosizye umwenzo, yaleka wavwanga ukwaula ukwelenganya.

³⁴ Yakana ukulovya umutundu, wakwe vino Yawe wayapile ilamulo,

³⁵ lelo yamatwalana sile na inamasi yakopola ni micitile yao.

³⁶ Yatumikila nu tuluwi twao, tuto utwayafutukile ituya wa nkose.

³⁷ Yapeela na ana yao aonsi na anaci wa mpolelwa uku mipasi yankota.

³⁸ Yazwisya nu wazi wa antu akaele, uwazi wa ana yao aonsi na anaci, yayo yano yatuulile utuluwi twaku Kenani, yasuka yakowezya ni mpanga yao uku wazi uo.

³⁹ Yaikowezyanga aisikulu ku vicitwa vyao. Yacitanga ukakasi uku vicitwa vyao, ungati acizelele.

⁴⁰ Caleka Yawe asokela antu yakwe, nga wene yali wa cintu camuselu kunoli.

⁴¹ Ali pakuyatazyela wayasumba umu makasa ya anisi yao, ainamasi ayano yayateeka.

⁴² Anisi yao yayacuzyanga nu kuyateeka amaila avule.

⁴³ Insita izingi wene wayatuulanga, lelo yene yamusuulanga sile ku mufulo, yasuka lyene yailetelela yaponela nu mu kwifya.

⁴⁴ Lelo wene wayayelelanga ulanda, apakuvwa inkuuta yao.

⁴⁵ Wiusyanga ulayo uno walaine nayo, ali pakuyuvwila inkumbu, pamulandu wa luse lwakwe ulukalamba.

⁴⁶ Wene aleka kuti yonsi yaya ayasenzile umu uzya yaye nu luse kunoyali.

⁴⁷ Ala ule ututuule, we Yawe Leza witu, ungala utupususye, utufumye umu inamasi, utukonganike apakuti twalumba izina lyako lyamuzilo, nu kuti tulole nu kuzangila mu ucindami wako.

⁴⁸ Lumbanyini Yawe, Leza wa ina Izlaeli. Mulumbanyini ukutandikila ndakai mpaka nu ku muyayaya!” Nga antu yonsi yavwanga yati, “Ciye vivyo kwene!” Lumbanyini Yawe.