Masamu 105 - Amazwi Yakwe Leza 2013

Leza na antu yakwe

¹ Taizini Yawe, salanganyini ululumbi lwakwe mumanyisye na inamasi ivicitwa vyakwe!

² Mwimbilini, mwimbilini amalumbo, mwalazye ivipezyamano vyakwe vyonsi!

³ Sansamukini pano sweswe antu yakwe. Lekini yao yonsi akapepa Yawe yasansamuke!

⁴ Yangini kunoli mulenge uwazwilizyo. Ikalini kunoli insita zyonsi.

⁵ Mwe amu mupanda wakwe Abulaamu, mwemuno mukamutumikila,

⁶ mwe amu mupanda wakwe Yakobo, mwe yasololwe yakwe, iusini ivizungusyo vyakwe ni vinjelengwe nga nu upinguzi uno wapile.

⁷ Wene ali Yawe, Leza witu, aliwe uwapeela amalamulo uku nsi yonsi.

⁸ Aliusya nu kusunga ulayo wakwe umuyayaya, ulayo uno wapile uku nkulo izimbi lyonga,

⁹ ulayo uno yalaine na Abulaamu nu mulapo uno wacisile kuli Isaki.

¹⁰ Yawe wacisile upangano uo ukuya uwamuyayaya na Izlaeli, ukuya ulayo wakuyelelela na Yakobo uno wavwanzile ati,

¹¹ “Nakupeela impanga ya Kenani ukuya icuma cako.”

¹² Antu yakwe Leza yali ampendwa inono, nupya yali aenyi umu mpanga ilya ya Kenani.

¹³ Yalulumbanga ukufuma ku mutundu uu na uu, ukufuma ku wene uu ukuya uku uze,

¹⁴ ukwaula ukuzumilizya nanti umutundu onga ukuyacuzya. Walesile nu kuti yamwene yamwi yavunukwe.

¹⁵ Wavwanzile ati, “Mutakumya uku asolelwe yane, mutacuzya yakasema yane.”

¹⁶ Lino walesile inzala umu mpanga yao Yawe wononyile ivyakulya vyonsi.

¹⁷ Lelo wakolezizye umuntu, Yosefu wino yasumvile umu uzya.

¹⁸ Yamunyefile amaulu mu minyololo, nu kwika insingo yakwe umwi koli lya cela,

¹⁹ mpaka usemo wakwe wiza wafikiliziwa ni zwi lyakwe Yawe lyasininkiziwa ukuti ilyacumi.

²⁰ Nga alino Umwene uwamu Eguputo atuma akuya musapula, kateeka wa mitundu uwa mukulula.

²¹ Ali pakumucita musika wa ng'anda yakwe, kangalila wa vyuma vyakwe vyonsi.

²² Apakuti asambilizye intunguluzi zyakwe ndi muno atemilwe, nu kupanda ivilolo vyakwe amalango yampomvu.

²³ Lyene Izlaeli aya uku Eguputo, Yakobo aya aikala umu mpanga yakwe Hamu.

²⁴ Leza ali pakusandulula ana yakwe, wayapeela na maka ukuluta apa anisi yao.

²⁵ Walesile aina Eguputo ukupata antu yakwe nu kucitila aomvi yakwe ucenjezi.

²⁶ Watumile Mose umuomvi wakwe pamwi na Aloni, yano wasolwile umweneco.

²⁷ Nayo ali pakucita ivizungusyo vyao, nga ni vipezya mano mu mpanga yakwe Hamu.

²⁸ Watumile imfinzi, mwafita na fititi, nga lelo yene yatalamila izwi lyakwe.

²⁹ Wasangwile amanzi yaya uwazi, yakoma ni nswi zyao.

³⁰ Nga alino yacula yiza yafunkuka umu mpanga yao, kumwi numu masano kwene muli yamwene.

³¹ Leza apeela iceo ca tuzizi kumwi na yamunyinyi viza vyalimba impanga yonsi.

³² Ali pakutonyezya imvula ya citalawe, kuya kupangalakansya monsi umu mpanga yao.

³³ Vyakontola ivilimwa vya matingi ni misamvu yao, kumwi ni miti umu mpanga yao.

³⁴ Apeela iceo, na makanta aiza nga ni vikwe ivisi vyakupenda.

³⁵ Viza vyalya isote lyonsi umu mpanga, vyamala pyu ivilimwa umu mpanga yao.

³⁶ Lyene akomola amayeli yao yonsi pyu umu mpanga yao, ana yonsi aonsi amu ndupwa zyonsi zya ina Eguputo.

³⁷ Ali pakufumya aina Izlaeli mwenemo, yasenda siluva na zaabu. Musi nati wenga uwasile nupya yali akome ndi auumi.

³⁸ Aina Eguputo yasekile apakukuka kwao, pamulandu wakuti yali ni ntete kunoyali.

³⁹ Leza ali pakwika ikumbi uku nkolelo lya kuyacingilila nga nu moto uwaku yapeela uluswepo uku usiku.

⁴⁰ Yamulenzile, nawe wayatumile inkwale, nu kuyapela icakulya ukufuma ukwiyulu icakuikusya.

⁴¹ Walepwile iciliwe na manzi yafuma mwenemo, yakonkolokela nu mu lwanga wa luzi.

⁴² Pano wiusyanga ulayo wakwe uwamuzilo uno wanenyile Abulaamu umuomvi wakwe.

⁴³ Avino wafumizye antu yakwe ala yatiyasansamuka, asololwe yakwe ala yakumila nu tupundu.

⁴⁴ Wayapile impanga zya mitundu, nu kupokolola vino imitundu yaculile,

⁴⁵ apakuti antu yakwe yasunga amasunde yakwe, yalondela na malamulo yakwe.