Masamu 103 - Amazwi Yakwe Leza 2013

Ukutemwa kwakwe Leza

¹ We mwenzo wane lumbanya Yawe! Nani kwene wensi kandumbanye izina lyakwe ilyamuzilo.

² We mwenzo wane lumbanya Umwene, utilila nanti conga pali vino wakukwatila uluse.

³ Aliwe akanjelela uluse kuli vyonsi vino nkaifya. Akapozya ni ndwala zyane zyonsi.

⁴ Akamfumya uku milomo yi lindi, nu kunkwatila uluse pee ni nkumbu.

⁵ Akampeela ivisuma vyonsi umu umi wane, apakuti ningakwata amaka wa mulumendo.

⁶ Yawe akavwangila kweneko yano yafyenga nu kuyapela insambu.

⁷ Wanenanga Mose vyonsi vino angacita, nu kuleka aina Izlaeli yailolele ivicitwa vya maka yakwe.

⁸ Ala Yawe uwaluse uwa cikuku, asisoka zuwa, wavulisya ulukundo.

⁹ Wene ataya na kalandauzi, icipyu cakwe cisiyelelela foo.

¹⁰ Apa kutuvunuka napo asituvunuka ukulingana navino cingaya umu kulondelela ukwifya nanti ukuluvyanya kwitu.

¹¹ Ndi vino iyulu lyavimbilikizya insi yonsi, avino nu luse lwakwe lwaya kuli yano yakamoopa.

¹² Ndi vino ufumondaka watalukana nu uwondaka, avino nawe akafuntusya uyi kunotuli.

¹³ Vino isi akakwatila ana uluse, ali vino Umwene akakwata uluse uku antu amukwatila icoopo.

¹⁴ Pano wene wamanya vino watuumba, wamanya nu kuti swemo sweswe lukungu sile.

¹⁵ Umuntu wene umi wakwe waya wi sote, akawalula nu kukula wi luwa lya mpanga.

¹⁶ Lino umuza wiza walyululula ali myulukile, vivyo kwene ilipita, uponga na pano lyali lili.

¹⁷ Lelo icikuuku cino Yawe wakwatila yao amucindika, awe cumi cene icakuyelelela pee, nu usuma wakwe nao usi wakusila umwapelela inkulo zyonsi.

¹⁸ Ali antu yano yakasunga upangano wakwe, yao akayela ningo amasunde yakwe.

¹⁹ Yawe wasimpa icilimba cakwe umwiyulu nga aliwe akateeka vyonsi mu wene wakwe.

²⁰ Lumbanyini Yawe, mwe angeli yakwe mwensi, mwe yacindami yamaka mwemuno mukafikilizya amasunde yakwe, mwemuno mukayela amazwi yakwe ndi wamwama.

²¹ Lumbanyini Yawe, mwe vita vyakwe vyonsi vya mwiyulu, mwe aomvi yakwe akacita vino wene akalonda.

²² Lumbanyini Yawe mwe viumbwa vyakwe vyonsi, mpanga sile yonsi mu wene wakwe. Caleka we mwenzo wane lumbanya Yawe.