Mapinda 9 - Amazwi Yakwe Leza 2013

Amano nu uwelewele

¹ Amano yakuula ing'anda yakweyo, nga yika ni ncesi zyaiko cinimbali.

² Yene yatiyakoma inyama zyayako nu kuteyanya waini, yatiyateyanya na pakulila.

³ Amano yatiyatuma aomvi yayako akazyana, pakuti yaye umu musumba, nu kwimilila umu ncende izitumpuke nga yalaizye yati,

⁴ “Uzye aweni imbutuma? Kaize kuno!” Nga iyanena ni ciwelewele yati,

⁵ “Izini mulye icakulya cane, mumwe na waini wino nteinye.

⁶ Tini ukuya imbutuma, nga muye nu uumi, mwapita umu nzila zya kwiluka.”

⁷ Wino wensi akalungika umuntu wa mitumfyo, akatukilwapo sile, na wino wensi akakalipila umuntu mwipe, ala wailetelela sile.

⁸ Utakalipila umuntu wa mitumfyo, pano limwi angakupata. Kalipila umuntu uwamano, pano wene alakucindikilapo.

⁹ Vyonsi vino ungasunda uwamano, ala ivyakumulundilapo amano. Sambilizya umuntu akacita vyaololoke, nga nawe amalundapo ukumanya.

¹⁰ Ukoopa Yawe ili ntendekelo ya mano. Nu kumanya Wamuzilo wilya, kuli kwiluka.

¹¹ Pano nene, ne mano nkakuvuzizya amanda, nu kulundapo imyaka ya umi wako.

¹² Ndi cakuti wakwata amano, ale cimakuzipila. Ndi wewe wamitumfyo, ale wailetela sile intazi.

¹³ Umwanaci iciwila waya umuzanzawile, wene atasundwa nupya imbutuma.

¹⁴ Akaikala pa mulyango wa ng'anda yakwe, watemwa ukwikala pa cilimba citali, apa ncende isanzuke umu musumba.

¹⁵ Alino pakwama yano yakupita umu nzila, akuya uku milimo yao ala akuti,

¹⁶ “Mwe mbutuma mwe, ala mwemwe nkwama!” Nupya alaizya nu ku viwelewele kwene ati,

¹⁷ “Mwe, ala amanzi akwiya aasuma. Nu mukate wakwiya mwavulisya umulyo.”

¹⁸ Lelo aonsi yayo yatamanyile ukuti antu akaya ukwakwe yakaitwala sile ku mfwa. Alino na yano yakaingila ukwakwe, yakulukila mpiti uku zimo.