Mapinda 8 - Amazwi Yakwe Leza 2013

Amano yaama antu uku cimulo

¹ Uzye amano yasiaama? Uzye kwiluka asisanzula izwi lyakwe?

² Amano yakaimilila apapela ya mwamba apipi nu museo, na pa masansa ya nzila.

³ Umupipi na pa mpongolo zya musumba ali pano yakalaizya yati,

⁴ “Mwe antu mwe! Ala amwemwe nkwama, ala izwi lyane likwama umuntu ali wensi.

⁵ Mwe mbutuma mwe, ala sambililini ukucenjela kunondi, vipuwa mwe, kopini amalango.

⁶ Mutezye, pano nkweti amazwi ampomvu akuti imunene, umukanwa kane mukufuma amazwi alungame.

⁷ Akanwa kane kakulaizya ivyacumi, pano napata ukulanda ivyantumpu.

⁸ Amazwi yonsi yano nkuvwanga yalungamana, mutaya ivyakupumbola nanti ivyaufi.

⁹ Amazwi yane yonsi pyu yaya atambalale kuli wiyo wensi akailuka, nupya asi yakome kuli yayo yano yuvwikisya.

¹⁰ Sololini utunguluzi wane ukuluta ukusolola siluva, nu kuzengela ukumanya ukuluta zaabu musuma cuze.

¹¹ Pano amano yakoma umutengo ukuluta ukasi, kutayapo nanti conga cino ungakumbwa icakuti cilingane na alio.

¹² “Nemo ne mano nene ndi ciinda wa ucenjezi, anene nazanyile ukumanya ukutunguluke.

¹³ Icoopo kuli Yawe kuli kupata uyi. Napata icilumba, imitumfyo, imiyele iipe ni ntumpu.

¹⁴ Nene ndi ciinda akapanda amano, umweneco wa mano ampomvu. Anene wakutaila pano nkauvwikisya ningo ivintu, nupya inkweti na maka avule cuze.

¹⁵ Akaazwilizya yamwene ukuteeka, ni ntunguluzi ukupeela amasunde alungame anene kwene.

¹⁶ Nene nkaazwilizya yakateeka ivyakuteeka, na akalamba ukupingwila impanga.

¹⁷ Natemwa yayo antemwa, na wiyo uwacincila ukundonda akanzana.

¹⁸ Ivyuma nu ucindami vyaya kunondi, inkweti ukama nu longo.

¹⁹ Vino nemo nkapeela vilusile pali zaabu uku usuma, vyacila napali siluva kwene uku usuma.

²⁰ Nkapita umu museo wa ololoke, umu nzila ya ulungami.

²¹ Antu antemwa nemo nkayapeela ivyuma, nu kuzuzya ivyuma umu mang'anda yao.

²² “Yawe uwalenzile kuti nemo injeko, lino atatala watandika imilimo yakwe, ukufuma sile ku katalili.

²³ Nalenzilwe ukufuma ku manda yampiti mpiti, ukufuma sile ku utandiko lino insi itatala yapangwa.

²⁴ Navilwe ala kutacili kuye yemba, lino kutatala kwaya nu tufukoka twa nguzi kwene.

²⁵ Navilwe lino imyamba itacili iyeko, lino imilundu itatala yikwa mu vifulo vyakweyo,

²⁶ lino wene atatala wapanga insi ni misonso yakweyo kwene, lino atatala waumba nanti sile ikufi lyonga ilya musili lyakutandikilapo.

²⁷ Nemo apano nali, lino wene wisile iyulu mu ncende yaliko, na lino wene wapakinye iyulu na yemba,

²⁸ lino wisile amakumbi umu lwelele, na lino wafondwile utufukoka twamuli yemba,

²⁹ na lino wene wisile yanande yakwe yemba umwakuti amanzi yapelela, nemo apano nali. Lino watungilile insi nu lucesi, nemo apano nali.

³⁰ Nali umupipi na aliwe, ne ciinda wa milimo. Anene namuzanzyanga cila wanda, ala nkusansamuka panoli.

³¹ Nasansamukanga nu kuzanga umu nsi umukaikala antu, nu kuzangila mu mutundu wa antu.

³² Icaleka fwandi, mwe yanane, kutikini kunondi, alongo antu yano yakalondela inzila zyane.

³³ Mwatezya ku mazwi yane autunguluzi, kuti muye na mano. Mutasuula amazwi yane foo.

³⁴ Walongo umuntu akanguvwa, wiyo akaikala manda pe pa mulyango wa ng'anda yane, wiyo akalolela apa wingililo wane.

³⁵ Pano wino wensi uwanzana, ala wazana uumi, nga Yawe alazangila munoli.

³⁶ Lelo wino wensi uwaposiwa ukunzana, wene ala wailetelela sile. Na wino wensi uwapata nene, ala wene watemwa imfwa.”