Mapinda 7 - Amazwi Yakwe Leza 2013

¹ We mwanane, uwaiusya amazwi yane, nu kuwaka amalamulo yane.

² Uwalondela amalamulo yane, ngu wapita ulumi. Uwawaka amasunde yane ndi vino ungawaka nyinalinso uwi linso lyako.

³ Uyacite kwati wayanyepelela apa minwe yako nu kuyalemba umu mwenzo wako ungati api seleti.

⁴ Uwanena amano uti, “Wewe uli kaci wane,” nga nu kwiluka nako ukunene uti, “Wewe uli cuzane uwapa mwenzo.”

⁵ Ivintu vii vilakufuntusya uku mwanaci cizelele, nu ku mwanaci cipitepite uwakwata amazwi akulyongofya.

⁶ Uwanda umwi mu nzota ya ng'anda yane, nacevizye uku museo,

⁷ nga muli yayo atali yakule, ndola umulumendo uwaula amano,

⁸ Nga nawe apita pa museo, apalama uku masansa yakwe cizelele wilya, alino atoola ni nzila iyalungama uku ng'anda yakwe.

⁹ Lyene amanguzi lino ilanzi lyawa, nga na lino kakuku katola,

¹⁰ awe mukwai umwanaci wilya aiza ku kumukomenkanya, ala azwite ungati acizelele, ala watavimba ni citambala uku manso.

¹¹ Umwanaci wiyo pasi pakukamuka, ni nsonyi atakweti, lyonsi asi wakupumbwa nanti wakupuswa apa museo.

¹² Limwi angaya akimilile apa cinsyoko ca museo, limwi nalyo aya aimilila apa museo uze, na limwi aya aimilila lwamu musolo.

¹³ Awe mukwai umwanaci wa kantu afukatila nu mulumendo, amutonsola nu kumuzyongwela amanso, nga avwanga ati,

¹⁴ “Nemo ilelo nalindi wakutuula uwila wautandano, nafikilizya ilelo ulayo wane.

¹⁵ Ali cino nizile nkukulonda, asi papo lyene nasuka nakuzana!

¹⁶ Ala nemo natinanzikila calimwi amalangeti pa musanzi wane, inanzikapo ni nsalu izitelepelele zyaku Eguputo.

¹⁷ Nimfumilizya penepo na mule nga nu usule uwa cinunu cisuma, nga na kinamoni.

¹⁸ Ale twapita tukaipakizye icitemwiko mpaka kuce.

¹⁹ Pano uwane asi pa ng'anda, walela apa lwendo ulutali.

²⁰ Wasenda icola icizilemo impiya, nga atalawela zuwa, suka pacisila ca milungu iili.”

²¹ Fwandi avino amutunka apa kumukolopezya vivyo, amukwetela ing'anda kasi apa kumuongola kwakwe apa kanwa.

²² Nga nawe amulondela umu kukolopekwa, kwati amasaye wino yatwala uku kufyula, nanti wa nswela iyalemwa uku citeyo,

²³ mpaka yaitulinkanya itima uku luceto, wa cunyi icaisumbila umwi liya, citamanyile ukuti yacipangila mpiti umi wa ciko.

²⁴ Lelo ndakai mwe ana yane sumbini amano uku mazwi yano nkumunena.

²⁵ Mutaleka imyenzo inu ipumbukile ku misango ya mwanaci kwene wiyo. Mutalulumba umu kulondela umwanaci wiyo.

²⁶ Pano wene wonona aonsi avule sana, nu kuletelela aingi mpaka yafwa.

²⁷ Ing'anda yakwe ili inzila yakuyila ku mbiko, iyatentemukila uku misolo ya mfwa.