Mapinda 6 - Amazwi Yakwe Leza 2013

Amalango nayauze akusundilamo umwana

¹ We mwanane, uzye walavile ukulipilila umuzo umulandu, uzye walipilila umuzo umulandu apakuti yauze yaloleleko?

² Uzye wasinilwa na mazwi yapa kanwa kako kwene, uzye wapingulwa na mazwi yano waivwangile we mwisikulu?

³ Acino we mwanane, pamulandu wakuti wemo waisumba mu makasa ya muzo, acino cita cii nga uipususye: katuka zuwa ngu mulenge kuti akutuule.

⁴ Utaleka amanso yako yuvwe utulo, nanti ivipa vyako vizyate.

⁵ Uituule ukwisumbo wakwe mpombo, nanti wa cunyi uku lukose.

Umukasu na kanyelele

⁶ Yanga uku kanyelele mukasu we, ulole imiyele ino kakwata, ukope amano kunokali.

⁷ Akanyelele katakwata musika, nanti kangalila nanti kateeka wakako.

⁸ Lelo kwene icisanya consi, kakakolonganika ivyakulya, nu kusezya ivyakulya vyakako umu nsita ya uzombozi.

⁹ Uzye wemo ukwikala sile ala watulala, ulaomba lilaci mukasu we? Uzye utulo twako tulasila lilaci?

¹⁰ Wemo kula wati ntale ndale panono, insipule sile panono, njikumbate sile panono nu kupuza,

¹¹ nu ulanda iukwizila wa ntalanganyi, upina nao ngu mupuzi.

¹² Umuntu iciwelewele, kacita wa viipe, akapita watasyetamika akanwa,

¹³ akasinizya ilinso lyakwe, akasyesyetezya ulwazo lwakwe, nu kukapizya ku minwe yakwe,

¹⁴ waya nu usomvi mu mwenzo wakwe, nu kupanga lyonsi amapange aipe, akakatusya nu lwete.

¹⁵ Icaleka uononesi uliza umupumikizye, alapona zuwazuwa ukwaula icakumutuula.

¹⁶ Kwaya ivintu mutanda vino Yawe wapata, ivintu cinimbali vino umwenzo wakwe wapatisya.

¹⁷ Amanso ya cilumba, ululimi lwaufi, iminwe ikazwisya uwazi wakaele,

¹⁸ umwenzo ukaelenganya amapange alola uku viipe, ulwazo ulwangupale uku kucita iviipe,

¹⁹ kambone waufi akalanda ivya ntumpu, nga nu muntu wino akasongelekanya akundwe.

²⁰ We mwanane, uwalondela amasunde yakwe so, utasula vino nyoko akukusambilizya.

²¹ Uwavisunga pe umu mwenzo wako, nu kuvinyepelela pe umu nsingo yako

²² Ali vino vimakutungululanga umwakupita, vimakuwakanga lino walala, vimalandanga nawe lino wakatuka.

²³ Pano amasunde yali wa lukozyo, nu usambilizyo uli wa luswepo. Pano ukukalipilwa nu ufuke ili nzila ya umi.

²⁴ Amasunde yaa yangakufuntusya uku anaci aipe, aci ya eneco, yayo akakolopezya aonsi.

²⁵ Utakumbwa ukuyemba kwakwe, utaleka akuleme pakukuzyongwela manso.

²⁶ Pano umwanaci cizelele ungamukala ku mukate sile, lelo cizelele muka mweneco wimilila sile apa kulovya umi wako.

²⁷ Uzye umuntu angaipalila umoto apa cisao, ukwaula kuti aoce ivyakuzwala vyakwe?

²⁸ Uzye umuntu angalyata apa munyeswa, ukwaula ukupya uku ngazo?

²⁹ Ivyaya umuntu akalonda umuci wa muze wensi uwamukumya alapeziwa.

³⁰ Umuntu ali ni nzala ndi wiya, antu yasimusuula, foo.

³¹ Nanti ndi yamulema, ali nu kuswilizyapo amaila cinimbali, nanti angala alipile ivyuma vyonsi ivya mung'anda yakwe.

³² Lelo uwayembuka nu muci wa muze wene wuulilwa amano, awe wene ala wailya umweneco.

³³ Wene wailetelela sile inguma ni ntusi, nga ni nsonyi zyakwe zitalatala zifuutike.

³⁴ Pano uzuwa ukakatusya icipyu cakwe iya, wene atalazingota pa kucita icilanduzi.

³⁵ Atalazumila ivyakumulipilapo, nanti sile uwila, utange umuwezye umwenzo.