Mapinda 5 - Amazwi Yakwe Leza 2013

Funtuka kuli yamangu yacizelele

¹ We mwanane, ika umwenzo wako uku vikulu vii ivya mano, uteye ikutwi kunondi nu kuvwikisya ningo amalango yonsi,

² pakuti uwaelenganya ningo na mano, alino napa kanwa kako uwavwanga ivya mano.

³ Pano umulomo wakwe cizelele wakwata utwakunonongola utulyompe wa uci, amazwi yakwe yatelepa nu kusongoloka wa mafuta.

⁴ Lelo impela yaviko yawaya nu kukalipisya wa ngweko, yakalipa wa lupanga ulunyolwe konsi konsi.

⁵ Intampulo zyakwe zikatungulula ku mfwa, pakupita mwenemo ala wasimwilila uku malindi.

⁶ Wene asilondela inzila ya umi nanti panono foo. Inzila zyakwe izyaku ononesi ni lovyo, lelo umweneco atacimanya cico awe.

⁷ Acino mwe yanamwe, munguvwikisye, mutatazyela amazwi yapa kanwa kane.

⁸ Uwafuntuka ku mwanaci wa misango iyo, utaezya ukupalama ku mulyango wa ng'anda yakwe.

⁹ Limwilimwi umucinzi wako ungalenga yauze yapusukile mwenemo, nu kulundulula imyaka ya antu ya vikanza ndi yuvwa kunuli.

¹⁰ Nupya cingalenga na enyi yailyokezye apamulandu ni cuma cako, uzombozi wa milimo yako ulaponela umu makasa ya apita nzila.

¹¹ Alino apa mpela ya umi wako ulalosya, lino umunyefu onsi ku mwili wako watondowala, wa nkoko ya kazombonyika.

¹² Lilyo kwene ulailizyanya uti, “Kalanda kasikolo! Silolini vino nemo nakanyile ukusundwa! Umwenzo wane watalamile ukulungikwa!

¹³ Nemo ntuvwilile amazwi yakwe yakasambilizya yane, natalamile yanakambuza yane.

¹⁴ Kwasyala sile kwempe, nga nalowelela apakasi ki uvi lyonsi.”

¹⁵ We, sule uwaimwela amanzi umu cifula cako we mweneco, kuli kuti uye wacumi ku wako amanda pe.

¹⁶ Uzye wemo ukulonda ana yako yaye nyanya ponsi kwene, wa manzi akukonkoloka umu miseo?

¹⁷ Ana yako yalinzile yaya ana akuivyalila we mweneco, yasi akwankana na enyi, awe.

¹⁸ Acino sansamuka sile nu muci wako wenga, Uwazangila muli mama wako uwaku ulumendo wako.

¹⁹ Wene wenga sile ali musuma wakwe kampombo, amayele yakwe antutu yamakuzanzyanga pe. Ucisotwe wakwe utalatala usufuke manda pe, usuma wakwe umalyompelelangako wa kanyama kanone.

²⁰ We mwanane, uzye apacani cino wemo ungalyongofiwa nu mwanaci cizelele? Ungakumbatila uli umwanaci asi wako?

²¹ Yawe akaceceta imipitile ya muntu cila nsita, ni nzila zyakwe akazilolekesyapo zyonsi pyu.

²² Ivicitwa viipe vya muntu mwipe vikaya iciteyo cakulemyamo umwisikulu, ni milimo iipe iya mukanda ikamuvimbilikizya.

²³ Wene akafwa pamulandu wakuulilwa imiyele isuma, akaponga pamulandu wa uwelewele wakwe ukulu.