Mapinda 4 - Amazwi Yakwe Leza 2013

¹ Mwe ana, si mwauvwila amasunde yakwe yaso, kutikini apakuti mukwate amalango yakumanyilako ivintu.

² Nemo namamupeela amalango asuma, mutezya mufume muli vino nkumusambilizya.

³ Lino nemo nali munono umu ng'anda ya akwasi yane, mumo kwene amuno naicefyanga nu kupeela umucinzi kuli yamayo,

⁴ yatata yansambilizyanga na mazwi ala yakuti, “Uwake umu mwenzo wako vyonsi vii vino nkukunena, usunge amasunde yane, pakuti uye nu umi.

⁵ Uwalonda amano, uwalonda nu kwiluka, utailila, utaezya nu kusula amazwi yane.

⁶ Utatazyela amano, ali yano yamakusunganga. Uwayatemwa nayo yamakulindanga.

⁷ Amano cili cintu cikulu. Caleka kwata amano. Pakulola amalango, ulinzile wasumbilapo ivyuma vyako vyonsi.

⁸ Temwa amano, nayo yalakucindamika. Uyazengele nga nayo yamakuletela ululumbi.

⁹ Yamakuzwika ingala iyembe uku mutwe wako, nu kukupeela inkata ya ucindami.”

¹⁰ Uvwa kuno mwanane, pokelela amazwi yane, ndi wacita cico amanda yako yalavula pano nsi.

¹¹ Nemo nakulanga imisango yakukwatilamo amano, nu kukutungulula umu nzila zya ulungami.

¹² Ndi cakuti walondela mwenemo, lyene kutalatala kuye icintu icakukucilikila inzila, ndi wasimula mwenemo utalapumika foo.

¹³ Sunga masunde yane, utayasuula. Uyawake pano uli umi wako.

¹⁴ Utaingila umu nzila ya antu aipe, utapita umu nzila ya vipondo.

¹⁵ Uwafuntukako, utapitamo, alulukamo, upambate.

¹⁶ Pano yene pakulala utulo, suka yatala yaifya. Yasilola utulo suka sile yatala yacitapo cimwi iciipe uku muntu.

¹⁷ Pano yene icakulya cao ukuulungana na ukaleta nzololo. Ni cakumwa cao, ukakasi.

¹⁸ Inzila ya antu asuma, yaya wa luswepo lwa pamacaca, lulo ulukakulilako mpaka ilanzi ilisanzama.

¹⁹ Inzila ya antu aipe, yaya wa mfinzi usiku, yene yatange yamanye cino yakupumikako.

²⁰ We mwanane, kutika uku mazwi yane, teya amatwi kuli vino nkulanda.

²¹ Utaleka vifume umu manso yako, uwaviwaka umu mwenzo wako.

²² Pano vyene uli umi kuli yayo akavizana, vikapeela umutende ku mwili onsi.

²³ Apa vintu vyonsi uwasunga umwenzo wako. Pano umwaya intulo izikapela umi.

²⁴ Uwafutatila akanwa akakalanda ivyaufi, nu kufuntuka ku milomo ya ucenjezi.

²⁵ Leka amanso yako yalolekesye uku nkolelo, nu kutontomezya amanso apalungatane nawe.

²⁶ Leka inzila yako iye itambalale, na pali ponsi pano ukupita paye apakome ndii.

²⁷ Utapalukila kwilunji nanti kwimani, funtusya ingazo zyako uku ui.